હિન્દીમાં એક બહુ જ જાણીતું ગીત છેઃ હમ હોંગે કામિયાબ એક દિન... મન મેં હૈ વિશ્વાસ...’ આપણે સહુએ આ ગીત સાંભળ્યું છે તો જરૂર, પણ જીવનમાં તેનો અમલ કેટલો કર્યો એમ કોઇ કહે તો મોટા ભાગના મોં સિવાઇ જાય. જોકે પોલેન્ડના આ ભાયડાની વાત અલગ છે. તેણે ભલે આ ગીત સાંભળ્યું નહીં હોય, પણ તેનો જુસ્સો કાબિલેતારીફ છે. ઘણીવાર લોકો એક કે બે વાર નિષ્ફળતા મળતાં જ હિંમત હારીને બેસી જાય છે ત્યારે પોલેન્ડના ટાર્નોવ શહેરમાં રહેતા આ વ્યક્તિએ સાબિત કરી દેખાડ્યું છે કે જો મનમાં અતૂટ વિશ્વાસ હોય તો દુનિયાની કોઈ તાકાત તમને રોકી શકતી નથી. આ ભાઇએ 9 વર્ષના અંતે 139માં પ્રયત્ને ડ્રાઇવિંગ લાયસન્સ માટેની થિયરી એક્ઝામ પાસ કરી છે. આ વ્યક્તિ વર્ષ 2017થી ડ્રાઇવિંગ લાયસન્સ માટેની થિયરી એક્ઝામ એટલે કે કોમ્પ્યુટર ટેસ્ટ આપતો હતો. આ 9 વર્ષમાં દુનિયા બદલાઈ ગઈ, ટેકનોલોજી બદલાઈ ગઈ, પણ તેનો ઈરાદો ન ડગ્યો. સતત 138 વખત કોમ્પ્યુટર સ્ક્રીન પર ‘FAIL’ લખેલું જોવા છતાં તેણે હાર ન માની. આખરે 139માં પ્રયાસમાં તેણે પરીક્ષા પાસ કરી છે. પરીક્ષા ફી પેટે તેણે અત્યાર સુધીમાં અંદાજે 1,800 યુરો (આશરે રૂ. 1.75 લાખ) ખર્ચ્યા છે.
