લંડનઃ હજારો રેલવે કામદારો આ મહિનામાં ત્રણ દિવસની હડતાળ પર જશે. રેલ, મેરીટાઇમ એન્ડ ટ્રાન્સપોર્ટ યુનિયન (RMT) અને 13 ટ્રેન ઓપરેટરોએ 21, 23 અને 25 જૂનના રોજ હડતાળની તરફેણમાં મતદાન કર્યું છે. RMTએ જણાવ્યું હતું કે રોગચાળા દરમિયાન કામ કરનારા રેલ કર્મચારીઓને પગાર ફ્રીઝનો સામનો કરવો પડી રહ્યો છે.
આ સમસ્યાનું કોઇ સમાધાન ના દેખાતા ગ્લાસ્ટનબરી વીકએન્ડ પર સમગ્ર નેટવર્ક પર રેલ, મેરીટાઇમ એન્ડ ટ્રાન્સપોર્ટ યુનિયન (RMT)ના સભ્યો અને 13 ટ્રેન ઓપરેટરો 21, 23 અને 25 જૂનના રોજ વોકઆઉટ કરશે. રેલ હડતાલને સાથ આપવા માટે ટ્યુબ કામદારો પણ 21 જૂને હડતાળ પર જશે, જેમાં વ્યાપક મુસાફરી અરાજકતાનો ભય છે. 24 કલાકના લંડન અંડરગ્રાઉન્ડ સ્ટોપેજ સાથે આ 33 વર્ષોની સૌથી મોટી રેલ હડતાળ બની જશે.
દરમિયાન, હિથ્રો ખાતે બ્રિટિશ એરવેઝ દ્વારા નિયુક્ત સેંકડો ચેક-ઇન અને ગ્રાઉન્ડ સ્ટાફે આજે હડતાલની કાર્યવાહી પર મતદાન કરવાનું શરૂ કર્યું. આ હિલચાલ ઉનાળાની રજાના સમયગાળા દરમિયાન યુકેના સૌથી વ્યસ્ત એરપોર્ટ પર વધુ અરાજકતાનું કારણ બની શકે છે.
કયા ટ્રેન ઓપરેટરોને અસર થશે?
નેશનલ રેલના યુનિયન સભ્યો અને 13 જુદા જુદા ઓપરેટરોએ આ મહિને હડતાળની કાર્યવાહી હાથ ધરવા માટે મત આપ્યો છે:
• અવંતી વેસ્ટ કોસ્ટ • c2c • ચિલ્ટર્ન રેલ્વે • ક્રોસકન્ટ્રી • ઈસ્ટ મિડલેન્ડ્સ રેલ્વે • ગ્રેટર એંગ્લિયા • GWR • LNER • નોર્ધર્ન • સાઉથઈસ્ટર્ન • સાઉથ વેસ્ટર્ન રેલવે • ટ્રાન્સપેનાઇન એક્સપ્રેસ • વેસ્ટ મિડલેન્ડ્સ ટ્રેનો (લંડન નોર્થવેસ્ટર્ન રેલ્વે સહિત)
