લંડનઃ બ્રિટનમાં સ્ટાફની અછતને પહોંચી વળવા હજારો વિદેશી કેર વર્કર્સ પોતાનો દેશ છોડીને અહીં આવ્યા હતા પરંતુ હવે તેઓ નોકરી વગર રઝળી પડ્યા છે. ગેરકાયદેસર એમ્પ્લોયર્સ અને કર્મચારીઓના શોષણ સામે સરકાર દ્વારા લેવાયેલા કડક પગલાંના કારણે હજારો વિદેશી કેર વર્કર્સ પ્રભાવિત થઇ રહ્યાં છે.
છેલ્લા એક વર્ષમાં સરકારે 4,403 સ્કિલ્ડ વર્કર વિઝા સ્પોન્સર લાયસન્સ રદ કર્યા છે. આમાંથી 872 લાયસન્સ હેલ્થ અને સોશિયલ કેર સેક્ટરના છે. મે 2025 સુધીમાં આશરે 40,000 જેટલા વર્કર્સને અસર થઈ હોવાનો અંદાજ છે. વર્ક્સ રાઈટ સેન્ટર ચેરિટી અનુસાર, વિસ્થાપિત થયેલા આ કેર વર્કર્સમાંથી માત્ર ત્રણ ટકા જ નવી નોકરી મેળવવામાં સફળ રહ્યા છે. આનું મુખ્ય કારણ સ્પોન્સરશિપનો ઊંચો પ્રારંભિક ખર્ચ અને કૌશલ્યનો અભાવ છે. વર્કર્સને નવો સ્પોન્સર શોધવા માટે માત્ર 60 દિવસનો સમય આપવામાં આવે છે નહીંતર તેમણે દેશ છોડવો પડશે.
સ્કિલ્સ ફોર કેરના અંદાજ મુજબ, ઇંગ્લેન્ડમાં એડલ્ટ સોશિયલ કેર ક્ષેત્રમાં 96,000 જગ્યાઓ ખાલી છે. યુકેના અન્ય તમામ ઉદ્યોગો કરતાં આ ક્ષેત્રમાં ખાલી જગ્યાઓનું પ્રમાણ ત્રણ ગણું વધારે છે. પરંતુ સરકાર દ્વારા વિદેશી વર્કર્સ માટેના નિયમો કડક બનાવવામાં આવ્યા બાદ નવી ભરતી કરવી મુશ્કેલ બની ગઈ છે. ત્રણ વર્ષ માટે વર્કરને સ્પોન્સર કરવા માટે નોકરીદાતાને આશરે 4,000 પાઉન્ડ અથવા નાના એકમો માટે 2,000 પાઉન્ડનો ખર્ચ એડવાન્સમાં ચૂકવવો પડે છે, જે ઘણી સંસ્થાઓ માટે શક્ય નથી.
કેર વર્કર્સ અને સંસ્થાઓનું માનવું છે કે સરકારે રોજગારદાતા-આધારિત સ્પોન્સરશિપ મોડેલના બદલે સમગ્ર સેક્ટર માટે એક સાર્વત્રિક વિઝા નીતિ બનાવવી જોઈએ, જેથી વર્કર્સ વિઝા ગુમાવ્યા વિના સરળતાથી એક સ્થળેથી બીજા સ્થળે કામ કરી શકે.
