લંડનઃ ઇંગ્લેન્ડના એરોન રાયે શાનદાર પ્રદર્શન કરીને યુએસ પીજીએ ચેમ્પિયનશિપ પોતાના નામે કરી લીધી છે. આ જીત સાથે જ તેમણે પોતાની કારકિર્દીમાં એક નવો ઇતિહાસ રચી દીધો છે. આ તેમની કારકિર્દીનું સર્વપ્રથમ મેજર ટાઇટલ છે. આ સાથે જ તેઓ એક સદી કરતાં પણ વધુ સમયમાં વાનામેકર ટ્રોફી જીતનારા પ્રથમ ઇંગ્લિશ ખેલાડી બન્યા છે. એટલું જ નહીં, છેલ્લા એક દાયકામાં આ ખિતાબ જીતનારા તેઓ પ્રથમ બિન-અમેરિકન ખેલાડી છે.
ટ્રોફી સ્વીકાર્યા બાદ ભાવુક થયેલા રાયે જણાવ્યું, "આ ખરેખર અવાસ્તવિક છે. આ સીઝન ગળાની ઇજાના કારણે મારા માટે ઘણી નિરાશાજનક રહી હતી તેથી અહીં વિજેતા તરીકે ઊભા રહેવું એ મારી કલ્પના બહારની વાત છે.
જ્યારે તેમની આસપાસના અન્ય દિગ્ગજ ખેલાડીઓ દબાણમાં આવીને ભૂલો કરી રહ્યા હતા, ત્યારે રાયે કોઈ પણ મોટી ભૂલ વિના પોતાની રમત પર પકડ જાળવી રાખી હતી. એરોન રાયની આ જીત સાથે જ, બીજા વિશ્વયુદ્ધ પછી મેજર ખિતાબ જીતનારા તેઓ માત્ર આઠમા ઇંગ્લિશ ગોલ્ફર બન્યા છે. આ જીત યુકેના ગોલ્ફ જગત માટે એક સુવર્ણ ક્ષણ સમાન છે.
