એનએચએસના ઇતિહાસમાં પહેલીવાર જુનિયર અને સીનિયર ડોક્ટરો સાગમટે હડતાળ પાડશે

લંડનઃ એનએચએસના ઇતિહાસમાં પહેલીવાર ઇંગ્લેન્ડમાં જુનિયર અને સીનિયર ડોક્ટરો એકસાથે હડતાળ પર જવાની તૈયારી કરી રહ્યાં છે. સરકાર સાથે પગાર વધારા મુદ્દે ચાલી રહેલા વિવાદનો કોઇ ઉકેલ ન આવતાં જુનિયર અને સીનિયર ડોક્ટરોએ સપ્ટેમ્બર અને ઓક્ટોબરમાં ચાર દિવસ એક સાથે હડતાળ પર જવાનો નિર્ણય કર્યો છે જેના કારણે હોસ્પિટલોમાં અંધાધૂંધી સર્જાવાની સંભાવના વ્યક્ત કરવામાં આવી રહી છે. આ પરિસ્થિતિ માટે બ્રિટિશ મેડિકલ એસોસિએશન સરકારને જવાબદાર ગણાવી રહ્યું છે. માન્ચેસ્ટરમાં કન્ઝર્વેટિવ પાર્ટીનું વાર્ષિક અધિવેશન યોજાવાનું છે તે સમયગાળામાં ડોક્ટરો હડતાળ પર જશે. ડોક્ટરોએ 20 સપ્ટેમ્બર, 2,3 અને 4 ઓક્ટોબરે હડતાળ પર જવાનો નિર્ણય કર્યો છે.