લંડનઃ બકિંગહામ પેલેસે જાહેરાત કરી છે કે કિંગ ચાર્લ્સ આગામી કેરેબિયન પ્રવાસ દરમિયાન બ્રિટનના ઈતિહાસના સૌથી અંધકારમય દિવસોનો ઉલ્લેખ તો કરશે, પરંતુ તેઓ ગુલામી પ્રથામાં યુકેની ભૂમિકા માટે કોઈ સત્તાવાર માફી નહીં માંગે અથવા વળતર અંગે જાહેરાત નહીં કરે.
કિંગ ચાર્લ્સ પોતાના મંત્રીઓની સલાહ અને યુકે સરકારની સ્થાપિત નીતિને અનુસરી રહ્યા છે. યુકે સરકારનું માનવું છે કે ગુલામી પ્રથા એક ઘોર અપરાધ હતી પરંતુ તેના માટે નાણાકીય વળતર આપવું એ યોગ્ય ઉકેલ નથી. આ પ્રવાસ દરમિયાન કિંગ ચાર્લ્સ ધ બહામાસ, ગુયાના અને એન્ટિગુઆ એન્ડ બાર્બુડાની મુલાકાત લેશે જ્યાં તેઓ કોમનવેલ્થ દેશોના વડાઓની દ્વિવાર્ષિક બેઠકમાં પણ હાજરી આપશે.
