જ્હોન્સનને દોષી ઠેરવતા પ્રિવિલેજ કમિટીના રિપોર્ટ પર કોમન્સની મહોર

લંડનઃ કોરોના મહામારીમાં લોકડાઉન દરમિયાન 10 ડાઉનિંગ સ્ટ્રીટ ખાતે પાર્ટીઓના આયોજન મુદ્દે બોરિસ જ્હોન્સને જાણીજોઇને સંસદને ગેરમાર્ગે દોરી હોવાનું તારણ આપતા રિપોર્ટને હાઉસ ઓફ કોમન્સે બહુમતીથી સ્વીકારી લીધો છે. હાઉસ ઓફ કોમન્સમાં પ્રિવિલેજ કમિટીના રિપોર્ટ પર કરાયેલા મતદાનમાં રિપોર્ટની તરફેણમાં 354 અને વિરોધમાં ફક્ત 7 મત પડ્યાં હતાં. પૂર્વ વડાંપ્રધાન થેરેસા મે, કોમન્સના લીડર પેની મોરડૌન્ટ, એજ્યુકેશન સેક્રેટરી જિલિયન કીગન સહિતના વરિષ્ઠ કન્ઝર્વેટિવ સાંસદોએ રિપોર્ટની તરફેણમાં મતદાન કર્યું હતું જ્યારે સર બિલ કેશ, નિક ફ્લેચર, એડમ હોલોવે, કાર્લ મેકકાર્ટની, જોય મોરિસ્સી અને હીથર વ્હીલરે વિરુદ્ધમાં મતદાન કર્યું હતું.