લંડન: છેલ્લા ચાર વર્ષમાં નંબર પ્લેટની ચોરી અને ક્લોનિંગના કિસ્સાઓ બમણાથી પણ વધુ નોંધાયા છે. દેશમાં વધી રહેલા પોલીસ સર્વેલન્સ અને કેમેરાની નજરથી બચવા માટે ગુનેગારો હવે મોટા પાયે આ પદ્ધતિનો ઉપયોગ કરી રહ્યા હોવાનું સામે આવ્યું છે.
અહેવાલ અનુસાર ઓટોમેટિક નંબર પ્લેટ રેકગ્નિશન કેમેરાના વધતા વ્યાપને કારણે ગુનેગારો પકડાઈ જવાની બીકે અન્ય વાહનોની નંબર પ્લેટ ચોરી રહ્યા છે અથવા તો ડમી પ્લેટ બનાવી રહ્યા છે. આ ટ્રેન્ડને કારણે માત્ર કાયદો અને વ્યવસ્થા જ નહીં પરંતુ સામાન્ય નાગરિકોની મુશ્કેલીમાં પણ વધારો થયો છે.
નંબર પ્લેટ ક્લોનિંગને કારણે અનેક નિર્દોષ વાહનચાલકોને ટ્રાફિકના એવા નિયમોના ભંગ બદલ દંડ મળી રહ્યો છે જે તેમણે ક્યારેય કર્યા જ નથી. ગુનેગારો અન્યની નંબર પ્લેટ લગાવીને ગુના આચરે છે અથવા ટ્રાફિક નિયમો તોડે છે જેના પરિણામે અસલી માલિકોએ કોર્ટ અને પોલીસ સ્ટેશનના ધક્કા ખાવા પડે છે.
છેલ્લા 4 વર્ષમાં નંબર પ્લેટની ચોરીમાં 100% થી વધુનો વધારો થયો છે. પોલીસ કેમેરાથી બચવા માટે આ નવો ગુનાહિત ટ્રેન્ડ શરૂ થયો છે. મધ્યમ વર્ગના વાહનચાલકો ક્લોનિંગના કારણે આર્થિક અને કાયદાકીય મુશ્કેલીમાં મુકાયા છે.
