લંડન
કિંગ ચાર્લ્સની તાજપોશીના અવસર માટે ભારતના પશ્ચિમ બંગાળની પ્રિયંકા મલિકે ક્વીન કેમિલા માટે એક કોરોનેશન ડ્રેસ ડિઝાઇન કર્યો છે. બ્રિટિશ રાજવી પરિવારે પ્રિયંકાના આ પ્રયાસની નોંધ લેતાં તેનો આભાર માનતો પત્ર પાઠવ્યો છે. પ્રિયંકા મલિક કોલકાતાથી 50 કિમી દૂર આવેલા હૂગલી જિલ્લાના સિંગુર ખાતે રહે છે.
ફેશન ડિઝાઇનર બનવાનો પ્રયાસ કરી રહેલી પ્રિયંકાના પ્રયાસને ક્વીન કોન્સોર્ટે બિરદાવ્યો છે અને તેને ટેલેન્ટેડ આર્ટિસ્ટ ગણાવી છે. બ્રિટિશ રાજવી પરિવાર દ્વારા પાઠવાયેલા પત્રમાં જણાવવામાં આવ્યું છે કે ખુબ સુંદર ડ્રેસની ડિઝાઇન મોકલવા માટે ક્વીન કોન્સોર્ટ તમારો આભાર માને છે. તમે ક્વીન કોન્સોર્ટ વિશે વિચારીને તેમના માટે સમય ફાળવી સ્કેચ તૈયાર કરીને મોકલ્યા તેના કારણે ક્વીન કેમિલા ઘણા પ્રભાવિત થયાં છે. તમે ઘણા કુશળ આર્ટિસ્ટ છો. ક્વીન કોન્સોર્ટ તમારો આભાર માને છે.
પ્રિયંકા કગે છે કે મેં ક્વીનના ડ્રેસ ઉપરાંત કિંગ ચાર્લ્સ માટે બ્રોચની પણ ડિઝાઇન તૈયાર કરી છે. આ મટે રાજવી પરિવાર સાથે મારે 6 મહિના ચર્ચા ચાલી હતી. મારી ડિઝાઇનની પ્રશંસા કરતો પત્ર પણ મને ક્વીન દ્વારા પાઠવવામાં આવ્યો છે. પ્રિયંકાએ જણાવ્યું હતું કે 7 મેના રોજ સાંજે યોજાનારી પાર્ટીમાં ક્વીન કેમિલા મારો ડિઝાઇન કરેલો ડ્રેસ પહેરશે.
