લંડન: બ્રિટનમાં પેટ્રોલ પંપ પરથી નાણાં ચૂકવ્યા વિના ભાગી જવાની ઘટનાઓમાં ભયાનક ઉછાળો જોવા મળ્યો છે. નવા આંકડાઓ અનુસાર, ગયા વર્ષની સરખામણીએ ઈંધણની ચોરીમાં 62% નો વધારો નોંધાયો છે. એક પેટ્રોલ પંપ માલિકના જણાવ્યા અનુસાર, આ પ્રકારની ચોરીને કારણે તેમને સપ્તાહના આશરે 2,000 પાઉન્ડનું નુકસાન થઈ રહ્યું છે.
અમેરિકા-ઈઝરાયેલ અને ઈરાન વચ્ચેના યુદ્ધને કારણે આંતરરાષ્ટ્રીય બજારમાં તેલના ભાવ આસમાને પહોંચ્યા છે. યુદ્ધ શરૂ થયા બાદ એક ફેમિલી કારમાં પેટ્રોલ પુરાવવાનો ખર્ચ 14 પાઉન્ડ અને ડીઝલનો ખર્ચ આશરે 27 પાઉન્ડ જેટલો વધી ગયો છે. વધતા ભાવોને કારણે ગ્રાહકોમાં રોષ જોવા મળી રહ્યો છે, જેના પરિણામે પેટ્રોલ પંપના સ્ટાફ સાથે દુર્વ્યવહાર અને અપશબ્દો બોલવાની ઘટનાઓ પણ વધી છે.
ગંભીર સ્થિતિ અંગે સરકારે જણાવ્યું છે કે ઈંધણની ચોરી કરનારાઓએ કાયદાના આકરાં પગલાંનો સામનો કરવો પડશે. બીજી તરફ પોલીસ વિભાગે ખાતરી આપી છે કે તેઓ આ મુદ્દે સક્રિય અભિગમ અપનાવી રહ્યા છે અને પેટ્રોલ પંપ માલિકોની સુરક્ષા માટે કડક પગલાં લેવામાં આવશે.
