લંડનઃ યુકે સ્થિત ભારતીય હાઇ કમિશન દ્વારા 7 ડિસેમ્બર બુધવારના રોજ ભારતના બંધારણના ઘડવૈયા બાબાસાહેબ ડો. બી આર આંબેડકરના 68મા પરિનિર્વાણ દિવસ નિમિત્તે સ્મારક સભાનું આયોજન કરાયું હતું. આ સભાનું આયોજન લંડનમાં ઇન્ડિયા હાઉસમાં આંબેડકર ગોલ ખાતે ફેડરેશન ઓફ આંબેડકરાઇટ્સ એન્ બુદ્ધિસ્ટ ઓર્ગેનાઇઝેશન, યુકે દ્વારા કરાયું હતું.
આ પ્રસંગે યુકેમાં ભારતના એક્ટિંગ હાઇ કમિશ્નર સુજિત ઘોષે જણાવ્યું હતું કે, ન્યાય અંગેની ઊંડી સમજ, સ્વતંત્રતા, સમાનતાના સિદ્ધાંતો પ્રત્યેની પ્રતિબદ્ધતાએ બાબાસાહેબને ભારતના બંધારણના ઘડતર માટે માર્ગદર્શન આપ્યું. તેમણે રચેલા બંધારણે ન કેવળ લોકતાંત્રિક ભારતનો પાયો નાખ્યો પરંતુ સદીઓથી ચાલી આવતા સામાજિક ભેદભાવને પણ નાબૂદ કર્યો હતો. બાબાસાહેબ સારી રીતે જાણતા હતા કે જાતિવાદ નાબૂદ કરવા માટે શિક્ષણ સૌથી શક્તિશાળી હથિયાર છે.
