લંડનઃ ‘ક્રેક કોકેન ઓફ ગેમ્બલીંગ’ તરીકે ઓળખાતા બેટીંગ મશીનો ટેક્સ આવક ઉભી કરતા હોવાથી તેની સમીક્ષા અટકાવી દેવાનો ચાન્સેલર જ્યોર્જ ઓસ્બોર્ન પર આક્ષેપ મૂકાયો છે.
‘ફિક્સ્ડ-ઓડ્સ બેટીંગ ટર્મિનલ્સ’ સામે પગલાં લેવામાં નિષ્ફળ રહેવા બદલ ઓસ્બોર્ન સામે ટોરી સાંસદોનો રોષ વધી રહ્યો છે. આ મશીનો દ્વારા સરકારને ગયા વર્ષે ૪૨૫ મિલિયન પાઉન્ડની ટેક્સની આવક થઈ હતી. આ ટર્મિનલ્સ પર પંટરો બ્લેકજેક અને રાઉલેટ જેવી કેસિનો ગેમ્સ પર એક સ્પિનમાં ૧૦૦ પાઉન્ડનું બેટીંગ કરી શકે છે. આ ગેમ્સની ભારે લતને લીધે વ્યક્તિ માટે દેવું, માનસિક આરોગ્યની સમસ્યા, સંબંધોનો વિચ્છેદ અને ગુનાખોરી તરફ વળવા જેવી સમસ્યા થઈ શકે છે.
