લંડન: બ્રિટનમાં ટંકશાળ પાડવામાં આવેલા અત્યાર સુધીના સૌથી સુંદર સિક્કા તરીકે ઓળખાતો 'ઉના એન્ડ ધ લાયન' પાંચ પાઉન્ડનો સોનાનો સિક્કો તાજેતરમાં લંડનની હરાજીમાં 1,10,000 પાઉન્ડમાં વેચાયો છે. આ દુર્લભ સિક્કો વેલ્સના ગ્વિનેડમાં એક ઘરની સફાઈ દરમિયાન મળી આવ્યો હતો.
વર્ષ 1839માં રાણી વિક્ટોરિયાના શાસનની શરૂઆતની યાદમાં આ સિક્કો તૈયાર કરવામાં આવ્યો હતો. સિક્કા પર રાણી વિક્ટોરિયાને એક ઔપચારિક શાસક તરીકે નહીં, પરંતુ કાલ્પનિક પાત્ર 'લેડી ઉના' તરીકે દર્શાવવામાં આવ્યા છે, જે એક સિંહનું માર્ગદર્શન કરી રહ્યા છે. આ ચિત્ર સત્ય, પવિત્રતા અને બ્રિટિશ રાષ્ટ્રની શક્તિનું પ્રતીક છે. બ્રિટિશ ઇતિહાસમાં આ પ્રથમ વખત હતું જ્યારે કોઈ શાસકને સાહિત્યિક કાલ્પનિક પાત્ર તરીકે સિક્કા પર દર્શાવવામાં આવ્યા હોય. માસ્ટરપીસની ડિઝાઇન રોયલ મિન્ટના મુખ્ય કોતરણીકાર વિલિયમ વિયોન દ્વારા તૈયાર કરવામાં આવી હતી.
આ સિક્કા ક્યારેય સામાન્ય ચલણ માટે બહાર પાડવામાં આવ્યા નહોતા. તે માત્ર ખાસ કલેક્ટર્સ માટે મર્યાદિત સંખ્યામાં બનાવવામાં આવ્યા હતા.
