લંડનઃ ગેરકાયદેસર ઇમિગ્રેશન પર નિયંત્રણ મેળવવા માટે લેબર સરકાર બ્રિટનના તમામ પુખ્ત વ્યક્તિ માટે ફરજિયાત ડિજિટલ આઇડી કાર્ડના પ્રસ્તાવોની ચકાસણી કરી રહી છે. વડાપ્રધાન સ્ટાર્મરના ચીફ ઓફ સ્ટાફ મોર્ગન મેકસ્વીનીના નેતૃત્વ હેઠળની થિન્ક ટેન્ક દ્વારા રજૂ કરાયેલ પ્રસ્તાવ પર 10 ડાઉનિંગ સ્ટ્રીટમાં વિચારણા ચાલી રહી છે.
લેબર પાર્ટીના પોલિસી પેપરમાં દલીલ કરાઇ છે કે નવું બ્રિટકાર્ડ વિના મૂલ્યે ફોન પર ડાઉનલોડ કરી શકાશે જે ગેરકાયદેસર ઇમિગ્રેશન પર નકેલ કસવામાં મદદરૂપ બનશે. તે ઉપરાંત પાસપોર્ટ અને બેનિફિટ્સ જેવી સરકારી સેવાઓમાં પણ તેનો ઉપયોગ કરી શકાશે.
યુરોપમાં ફક્ત બ્રિટન જ એવો દેશ છે જ્યાં આઇડી કાર્ડની સિસ્ટમ નથી. ટીકાકારોનો દાવો છે કે આ સિસ્ટમના અભાવમાં નોકરીઓમાં બ્લેક માર્કેટ ફુલ્યું ફાલ્યું છે. 2009માં છેલ્લી લેબર સરકારે આઇડી કાર્ડ સિસ્ટમ લાગુ કરવાનો પ્રયાસ કર્યો હતો પરંતુ ત્યારબાદ આવેલી એક પછી એક કન્ઝર્વેટિવ સરકારોએ આ યોજનાને પડતી મૂકી હતી.
