લંડનઃ બ્રિટનમાં તબીબી ઇતિહાસનો એક અત્યંત દુર્લભ અને ચોંકાવનારો કિસ્સો પ્રકાશમાં આવ્યો છે. યુનાઇટેડ કિંગડમમાં પ્રથમ વખત એવું નોંધાયું છે કે એકસાથે જન્મેલા જોડિયા બાળકોના પિતા અલગ-અલગ છે. મિશેલ અને લેવિનિયા ઓસ્બોર્ન તરીકે ઓળખાતી આ બહેનોના ડીએનએ રિપોર્ટમાં આ ચોંકાવનારી વિગતો સામે આવી છે.
સામાન્ય રીતે જોડિયા બાળકો એક જ પિતાના સંતાન હોય છે પરંતુ આ કિસ્સો સુપરફેકન્ડેશન તરીકે ઓળખાતી અત્યંત વિરલ જૈવિક પ્રક્રિયાનું પરિણામ છે. જ્યારે કોઈ સ્ત્રીના એક જ માસિક ચક્ર દરમિયાન બે અલગ-અલગ અંડકોષો રિલીઝ થાય અને તે બંને ટૂંકા સમયગાળામાં બે અલગ-અલગ પુરુષોના શુક્રાણુઓ દ્વારા ફલિત થાય ત્યારે આવા જોડિયા બાળકોનો જન્મ થાય છે.
ટેસ્ટિંગ બાદ જાણવા મળ્યું કે આ બહેનો ટ્વિન્સ હોવા છતાં ટેકનિકલી હાફ-સિબલિંગ્સ છે કારણ કે તેમની માતા એક જ છે પરંતુ પિતા અલગ અલગ છે. વિશ્વભરમાં આવા કિસ્સાઓ આંગળીના વેઢે ગણાય તેટલા જ જોવા મળે છે. આ અસાધારણ ખુલાસાએ તબીબી જગત અને સામાન્ય જનતામાં કુતૂહલ જગાડ્યું છે, જે માનવ પ્રજનન ક્ષમતાની જટિલતાઓને ફરી એકવાર રેખાંકિત કરે છે.
