લંડન: બ્રિટનમાં હવે એવો સમય આવી રહ્યો છે જ્યારે ગૃહિણીઓ અને વ્યવસાયોએ વીજળી બચાવવાને બદલે અમુક સમયે વધુ વીજળી વાપરવા બદલ વળતર અથવા સસ્તી વીજળી મળી શકે છે. નેશનલ એનર્જી સિસ્ટમ ઓપરેટર (NESO) દ્વારા આ અઠવાડિયાથી ડિમાન્ડ ફ્લેક્સિબિલિટી સ્કીમમાં મહત્વના ફેરફાર કરવામાં આવ્યા છે, જે અંતર્ગત વધારાના પુરવઠા સમયે ગ્રાહકોને પ્રોત્સાહન આપવામાં આવશે.
જ્યારે હવામાન અત્યંત સાનુકૂળ હોય, જેમ કે ખૂબ તડકો હોય તેવા વીક એન્ડમાં સોલાર પેનલ્સ દ્વારા પુષ્કળ વીજળી ઉત્પન્ન થાય છે. ઉનાળાના દિવસોમાં વીજળીની માંગ ઓછી હોય છે અને પુરવઠો વધારે હોય છે. આ વધારાની ઊર્જાનો બગાડ અટકાવવા અને સિસ્ટમને સંતુલિત રાખવા માટે હવે ગ્રાહકોને તે સમયે વોશિંગ મશીન, ડિશવોશર ચલાવવા અથવા ઇલેક્ટ્રિક વાહનો ચાર્જ કરવા માટે પ્રોત્સાહિત કરવામાં આવશે.
ઓફજેમે ગયા મહિને જ આ ફેરફારને મંજૂરી આપી હતી. NESO ના જણાવ્યા મુજબ, 2025 એ અત્યાર સુધીનું સૌથી વધુ સૂર્યપ્રકાશવાળું વર્ષ રહ્યું હતું અને લગભગ 2.5 લાખ નવા સોલાર પેનલ્સ ઇન્સ્ટોલ કરવામાં આવ્યા હતા. રિન્યુએબલ એનર્જીના વધતા વ્યાપને કારણે હવે પાવર સ્ટેશનો પરની નિર્ભરતા ઘટી રહી છે અને વધારાની વીજળીની સ્થિતિ વધુ સામાન્ય બની રહી છે.
આ યોજનાનો લાભ એવા ઘરોને મળશે જેમની પાસે સ્માર્ટ મીટર છે અને જેમના વીજ સપ્લાયર આ યોજનામાં સહભાગી છે. અત્યાર સુધી બ્રિટિશ ગેસ, ઇક્વિવોટ અને ઓક્ટોપસ એનર્જી જેવી કંપનીઓ આ સ્કીમમાં જોડાઈ છે.
ગ્રાહકોને આ યોજનાનો વિવિધ સ્વરૂપે લાભ મળી શકે છે, જેમકે અમુક કલાકો દરમિયાન મફત અથવા સસ્તી વીજળી, પોઈન્ટ્સ જે ગિફ્ટ કાર્ડમાં રૂપાંતરિત કરી શકાય અને રોકડ વળતર (કંપનીના નિર્ણય મુજબ).
