લંડન
વિશ્વમાં ઘણા દેશો સપ્તાહમાં ચાર દિવસ કામ અને 3 દિવસ આરામની નીતિ અપનાવી રહ્યાં છે. કોરોના મહામારી બાદ આ ટ્રેન્ડ વ્યાપક બનવા લાગ્યો છે. વર્ષ 2022માં બ્રિટનની પણ 70 કંપનીઓએ પ્રાયોગિક ધોરણે કર્મચારીઓને સપ્તાહમાં 4 દિવસ ફરજ પર બોલાવવાની શરૂઆત કરી હતી. 6 મહિનાની ટ્રાયલના પરિણામો દર્શાવે છે કે કર્મચારીઓની કામગીરીમાં 22 ટકાનો સુધારો જોવા મળ્યો હતો. હવે આ કંપનીઓએ ફોર ડે વર્ક વીકની પરંપરા જાળવી રાખવાનો નિર્ણય કર્યો છે.
એક અભ્યાસ અનુસાર બ્રિટનમાં શરૂ કરાયેલી આ ટ્રાયલના સારા પરિણામ જોવા મળી રહ્યાં છે. 3 દિવસની રજાના કારણે ગ્લોબલ વોર્મિંગની સામેની લડાઇમાં લાભની સાથે સાથે કર્મચારીઓના માનસિક આરોગ્યમાં પણ નોંધપાત્ર સુધારો જોવા મળી રહ્યો છે. એક પાયલોટ પ્રોજેક્ટના તારણ અનુસાર સપ્તાહમાં ચાર દિવસ જ કર્મચારીઓને કચેરીઓમાં કામ પર બોલાવવાના કારણે કાર્બન ઉત્સર્જનમાં 20 ટકા સુધીનો ઘટાડો થઇ શકે છે. આ પ્રકારની ટ્રાયલ સ્પેન, બેલ્જિયમ, ઓસ્ટ્રેલિયા અને ન્યુઝિલેન્ડ જેવા દેશોમાં પણ હાથ ધરાઇ છે. એક પર્યાવરણ એજન્સીના જણાવ્યા અનુસાર સપ્તાહમાં ફક્ત 4 દિવસ કામગીરીના પહલે પર્યાવરણની જાળવણીમાં મદદ મળી રહેશે.
જો સમગ્ર બ્રિટનમાં આ નીતિનો અમલ કરવામાં આવે તો પ્રદૂષણમાં મોટો ઘટાડો નોંધાઇ શકે છે. તેના કારણે સડકો પર વાહનોની સંખ્યા ઘટાડી શકવાની સાથે સાથે કચેરીઓમાં વીજળીનો ઉપયોગ પણ મર્યાદિત કરી શકાશે.
