લંડનઃ યુકે સ્થિત ભારત અને બાંગ્લાદેશના હાઇ કમિશનો દ્વારા સંયુક્ત રીતે લંડનના એક જાણીતા થિયેટર ખાતે બંગબંધુ મુજિબુર રહેમાનના જીવન પર આધારિત ફિલ્મ મુજિબઃ ધ મેકિંગ ઓફ નેશનનું સ્પેશિયલ સ્ક્રિનિંગ આયોજિત કરાયું હતું. 1971માં બાંગ્લાદેશની રચનાના મહાન વિજય અને ભારત તથા બાંગ્લાદેશ વચ્ચેની મિત્રતાની ઉજવણી માટે આ સમારોહનું આયોજન કરાયું હતું. આ પ્રસંગે બ્રિટિશ બાંગ્લાદેશી, બ્રિટિશ એશિયનો તેમજ હાઉસ ઓફ લોર્ડ્સના સભ્યો, રાજદ્વારીઓ, બ્રિટિશ શિક્ષણ શાસ્ત્રીઓ અને પ્રોફેશનલ્સ મોટી સંખ્યામાં હાજર રહ્યાં હતાં.
આ પ્રસંગે ભારતીય હાઇ કમિશ્નર વિક્રમ દોરાઇસ્વામીએ બાંગ્લાદેશના વડાપ્રધાન શેખ હસીના સાથેના તેમના અંગત સંબંધો અને ફિલ્મમાં યોગદાનની વાત કરી હતી. તેમણે જણાવ્યું હતું કે, વડાપ્રધાન હસીનાએ આ ફિલ્મના પ્રોજેક્ટમાં અંગત રસ દાખવ્યો હતો કારણ કે તેઓ પણ આ ઇતિહાસનો હિસ્સો છે. આ ફિલ્મ ભારત અને બાંગ્લાદેશ દ્વારા સંયુક્ત રીતે તૈયાર કરાઇ છે અને તેનું દિગ્દર્શન જાણીતા ભારતીય ફિલ્મ નિર્માતા શ્યામ બેનેગલે કર્યું છે.
