લંડનઃ યુકે જેને સુરક્ષિત માને છે તેવા દેશોની યાદીમાં ભારતને સામેલ કરવાના પ્રસ્તાવને સંસદીય સમિતિ દ્વારા પસાર કરી દેવાયો છે. હવે આ પ્રસ્તાવ હાઉસ ઓફ કોમન્સ અને હાઉસ ઓફ લોર્ડ્સમાં રજૂ કરાશે. સમિતિમાં સામેલ કેટલાંક સાંસદોએ આ પ્રસ્તાવનો વિરોધ કરતાં જણાવ્યું હતું કે ભારત સુરક્ષિત દેશ નથી. બ્રિટિશ સંસદ દ્વારા આ પ્રસ્તાવને મંજૂરી આપી દેવાશે તો ભારતીય નાગરિકો યુકેમાં રાજ્યાશ્રયની માગ કરી શકશે નહીં કે માનવ અધિકારના દાવા પણ કરી શકશે નહીં.
સંસદીય સમિતિમાં ભારત અને જ્યોર્જિયાને સુરક્ષિત દેશની યાદીમાં સામેલ કરવાના પ્રસ્તાવને 9 વિરુદ્ધ 2થી પસાર કરાયો હતો. આ યાદીમાં આલ્બેનિયા, નોર્વે, સ્વિત્ઝર્લેન્ડ અને યુરોપિયન સંઘના દેશો સામેલ છે. હવે સરકાર આ પ્રસ્તાવને સંસદના બંને ગૃહમાં રજૂ કરશે. સંસદમાં આ પ્રસ્તાવ પર કોઇ ચર્ચા નહીં થાય પરંતુ સીધું મતદાન થશે.
