માનવતાની સેવા માટે કિંગ ચાર્લ્સ દ્વારા નવો મેડલ શરૂ કરાયો

લંડનઃ ધરતીકંપ, પૂર જેવી કુદરતી હોનારતો અને ઇમર્જન્સીમાં બચાવ કાર્યમાં જોડાનારા લોકોને સન્માનિત કરવા નવો બ્રિટિશ મેડલ શરૂ કરાશે. કિંગ ચાર્લ્સ દ્વારા અપાનારા આ સન્માનમાં ઇમર્જન્સી કામદારો, બચાવ ટુકડીઓ સહિત ચેરિટી, સર્વિસ પર્સોનલ અને હેલ્થ વર્કર્સ દ્વારા કરાયેલી સેવાઓને ધ્યાનમાં લેવાશે. યુકે અને વિદેશમાં કુદરતી હોનારતોમાં અદ્દભૂત સાહસ દર્શાવી બચાવકાર્ય કરનારને આ સન્માન અપાશે. તેમાં કુદરતી હોનારતો ઉપરાંત યુદ્ધગ્રસ્ત વિસ્તારો અને મહામારીનો પણ સમાવેશ કરાયો છે. કેબિનેટ ઓફિસે જણાવ્યું હતું કે, આ માનવીય મેડલ યુકે સરકાર વતી રાહત કાર્યમાં જોડાનારને અપાશે પરંતુ તે ફક્ત બ્રિટિશ નાગરિકો પૂરતો મર્યાદિત નહીં રહે. આ મેડલ પર એકતરફ કિંગ ચાર્લ્સની તસવીર રહેશે જ્યારે બીજીતરફ માનવતાની સેવા માટે એવું લખાણ રહેશે.