લંડન: બ્રિટનના લોકપ્રિય બિઝનેસ રિયાલિટી શો ‘ધ એપ્રેન્ટિસ’ની 2026ની સીઝનમાં ભારતીય મૂળની કરિશ્મા વિજયે ઐતિહાસિક જીત હાંસલ કરી છે. પોતાની વ્યવસાયિક કુશળતા અને મજબૂત વ્યૂહરચનાના જોરે કરિશ્માએ ખિતાબ જીતવાની સાથે પ્રખ્યાત બિઝનેસ ટાયકૂન લોર્ડ એલન શુગર પાસેથી 2,50,000 પાઉન્ડનું જંગી રોકાણ પણ સુરક્ષિત કર્યું છે.
ફાઈનલમાં કરિશ્માનો મુકાબલો અન્ય પ્રતિભાશાળી સ્પર્ધકો સાથે હતો. લોર્ડ શુગરને પ્રભાવિત કરવામાં કરિશ્માનો બિઝનેસ પ્લાન સૌથી સચોટ અને ભવિષ્યલક્ષી સાબિત થયો હતો. જીતની જાહેરાત કરતા લોર્ડ શુગરે જણાવ્યું હતું કે, કરિશ્મામાં એક સફળ ઉદ્યોગસાહસિક માટે જરૂરી તમામ ગુણો છે.
કરિશ્મા વિજય તેની હેલ્થ અને વેલનેસ બ્રાન્ડના વિસ્તરણ માટે આ રોકાણનો ઉપયોગ કરશે. તેણીએ શો દરમિયાન સતત સાબિત કર્યું હતું કે તેની પાસે બજારને પારખવાની અદભૂત ક્ષમતા છે. તેની જીત બાદ બ્રિટનમાં વસતા ભારતીય સમુદાયમાં ખુશીની લહેર જોવા મળી રહી છે.
