લંડનઃ યુકેમાંથી અમીરોનું અન્ય દેશોમાં સ્થળાંતર રેકોર્ડ સ્તર પર પહોંચ્યું છે ત્યારે તમામની નજર હવે ચાન્સેલર રેચલ રીવ્ઝ દ્વારા 26 નવેમ્બર 2025ના બુધવારના રોજ રજૂ થનારા ઓટમ બજેટ પર ટકી છે. સત્તામાં આવ્યા બાદ લેબર સરકાર દ્વારા જે રીતે ધનવાનો પર કરવેરાનો બોજ વધારવામાં આવી રહ્યો છે તેના કારણે મોટી સંખ્યામાં અમીરો દેશ છોડીને અન્ય ટેક્સ હેવન દેશોમાં સ્થળાંતર કરી રહ્યાં છે. 2024માં દેશ છોડીને ચાલ્યા ગયેલા બ્રિટિશ નાગરિકોના આંકડા પણ ચોંકાવનારા છે. આ કડીમાં ભારતીય મૂળના સુનિલ મિત્તલ અને હરમન નરૂલા સહિતના હાઇ નેટવર્થ ધરાવતા ટાયકૂન પણ સામેલ થઇ રહ્યાં છે. નોન ડોમ ટેક્સ માળખામાં પરિવર્તન અને ઇનહેરિટન્સ ટેક્સ, એક્ઝિટ ટેક્સ સહિતના ચાન્સેલરના પ્રસ્તાવો અમીરોને દેશ છોડવા મજબૂર કરી રહ્યાં છે.
