લંડનઃ શિક્ષણ કાર્યોના દિવસોમાં બાળકોને શાળાથી દૂર રાખવાના કારણે તેમના માનસિક આરોગ્યને નુકસાન થાય છે અને તેમના શૈક્ષણિક પરિણામો પર પણ અસર પડે છે. બાળકો શાળામાં ઓછી રજા પાડે તે માટે સરકાર હવે એક નવા અભિયાનની શરૂઆત કરી રહી છે. કોરોના મહામારી પછી બાળકોની ગેરહાજરીમાં વધારો થયો છે. ઘણા વાલીઓ એમ માનવા લાગ્યા છે કે તેમના બાળકને દરરોજ શાળામાં હાજરી આપવાની જરૂર નથી.
શાળામાં ગેરહાજરી ઘટાડવા માટે એજ્યુકેશન સેક્રેટરી ગિલિયન કીગને એટેન્ડન્સ હબ અને એટેન્ડન્સ મેન્ટોરમાં વધુ રોકાણ કરવાની જાહેરાત કરી છે. આ માટે વાલીઓમાં નેશનલ માર્કેટિંગ કેમ્પેન ચલાવવામાં આવશે. આ અભિયાનનું સ્લોગન છે મોમેન્ટ્સ મેટર્સ, એટેન્ડન્સ કાઉન્ટ્સ...
સરકારે જણાવ્યું છે કે તે જે વાલીઓ સામાન્ય શરદી જેવી બીમારીમાં પણ પોતાના બાળકોને ઘેર રાખે છે અથવા તો વારંવાર રજા પડાવે છે તેમની મધ્યે આ અભિયાન ચલાવશે. વ્યાજબી કારણ વિના બાળકોને શાળામાં રજા નહીં પડાવવા માટે વાલીઓ મધ્યે ઓનલાઇન, સોશિયલ મીડિયા અને રેડિયો પર અભિયાન ચલાવવામાં આવશે.
