લંડનઃ અક્ષય પાત્ર યુકે દ્વારા હેરો સહિત 30થી વધુ બરોમાં 'હોલિડે હંગર પ્રોગ્રામ' હેઠળ બાળકોને ભોજન પુરું પાડવાનું કાર્ય હાથ ધરવામાં આવ્યું છે. ઉનાળાના વેકેશન દરમિયાન શાળા બંધ રહેતા જરૂરિયાતમંદ પરિવારોના બાળકોને મફત ભોજન મળતું બંધ થઈ જાય છે, જેને ધ્યાનમાં રાખીને આ સેવા શરુ કરવામાં આવી છે. આ કાર્યક્રમનો મુખ્ય હેતુ યુકેમાં ખાદ્ય અસુરક્ષાનો સામનો કરી રહેલા અંદાજે 45 લાખ બાળકો સુધી પહોંચવાનો છે.
સંસ્થાના પ્રવક્તાએ જણાવ્યું હતું કે, ઉનાળાની રજાઓ બાળકો માટે આનંદદાયક હોવી જોઈએ, નહીં કે ભોજન મેળવવાની ચિંતામાં વીતવી જોઈએ. આ રજાઓ પાછળ અનેક પરિવારો માટે ઘરના બિલ ચૂકવવા કે સંતાનો માટે પૌષ્ટિક આહારની વ્યવસ્થા કરવી તે અંગે ભારે અસમંજસની સ્થિતિ રહે છે. અમારો કાર્યક્રમ બાળકોને જરૂરી આહાર પૂરો પાડીને તેમનું શૈક્ષણિક અને ઉત્સાહવર્ધક ઉનાળુ સત્ર સુનિશ્ચિત કરે છે.
ઉત્તર લંડન સ્થિત કિચનમાંથી વહેલી સવારે તાજું ભોજન તૈયાર કરીને વિવિધ હોલિડે ક્લબ્સમાં પહોંચાડવામાં આવે છે. 2007માં સ્થપાયેલી આ સંસ્થાએ 2020થી અત્યાર સુધીમાં આશરે 9 લાખ ભોજન પીરસ્યા છે. સંસ્થા દ્વારા આ અભિયાનને વધુ વ્યાપક બનાવવા માટે સામાન્ય જનતા, વ્યાપારીઓ અને સામાજિક સંગઠનોને આર્થિક તથા સહયોગાત્મક મદદ કરવાની અપીલ કરવામાં આવી છે.
