લંડનઃ આગામી પાંચ વર્ષમાં મૃત અવસ્થામાં જન્મતા બાળકો એટલે કે સ્ટીલબર્થની સંખ્યા ઘટાડવાની યોજનાના ભાગરૂપે હોસ્પિટલમાં સારવાર લઈ રહેલી સગર્ભાઓ અથવા તો તેમના પાર્ટનર સ્મોકિંગ કરે છે કે નહીં તે ચકાસવા માટે તેમને કાર્બન મોનોક્સાઈડનો ટેસ્ટ કરાવવા જણાવાશે.
હોસ્પિટલો દ્વારા મહિલાઓની સગર્ભાવસ્થાના ૧૨મા અને ૨૬મા અઠવાડિયે ટેસ્ટ કરાશે. આંકડા મુજબ ઈંગ્લેન્ડમાં દર વર્ષે ૬૫,૦૦૦ સગર્ભાઓ ધૂમ્રપાન કરતી હોય છે પરંતુ, તે કબૂલતી નથી. યુકેમાં દરરોજ લગભગ નવ બાળકનો જન્મ મૃતહાલતમાં થાય છે.
