લંડનઃ હેરોના રહીશોને નિયમિત વોકિંગ ગ્રુપ્સ સક્રિય રાખવામાં લગભગ બે દાયકાથી મદદ કરી રહેલા બે પીઢ સ્વયંસેવકોનું તાજેતરમાં બહુમાન કરવામાં આવ્યું છે. વર્ષા બાવિશી (74 વર્ષ) અને ડેવિડ હાઉસ છેલ્લા 18 વર્ષથી કોઈપણ ઋતુ કે હવામાનની પરવા કર્યા વગર આ વોકિંગ ગ્રુપ્સનું નેતૃત્વ કરી રહ્યા છે. હેરો કાઉન્સિલ દ્વારા તેમને હેલ્ધી વોકિંગ પ્રોગ્રામમાં સૌથી લાંબી સેવા આપનારા સ્વયંસેવકો તરીકે અધિકૃત રીતે માન્યતા આપવામાં આવી છે.
વર્ષા બાવિશી 45 મિનિટની ધીમી ગતિની પદયાત્રાનું નેતૃત્વ કરે છે જ્યારે ડેવિડ હાઉસ 60 થી 90 મિનિટના લાંબા રૂટ્સ પર સમૂહને લઈ જાય છે, જેમાં બેલમોન્ટ રેટલર જેવા રૂટ્સનો સમાવેશ થાય છે. ચાલવાની સાથે આ સ્વયંસેવકો પિન્નરના સ્થાનિક ઇતિહાસ વિશે પણ રસપ્રદ માહિતી આપે છે.
પોતાના અનુભવ વિશે વાત કરતા વર્ષા બાવિશીએ જણાવ્યું હતું કે, આ માત્ર હળવી કસરત નથી, પરંતુ ચાલતા-ચાલતા લોકોને મળવા અને વાતચીત કરવાની ઉત્તમ તક મળે છે. જો તમે એકલતા કે નિરાશા અનુભવતા હોવ તો આ પદયાત્રાઓ તમારો ઉત્સાહ વધારવા અને લોકો સાથે જોડાવા માટેનો શ્રેષ્ઠ માર્ગ છે. આ સમૂહમાં મુખ્યત્વે 60 થી 80 વર્ષની વયના લોકો જોડાય છે, જેમાં સૌથી વયોવૃદ્ધ પદયાત્રી 90 વર્ષના છે.
