લંડનઃ બ્રિટનના કોર્નવોલના દરિયા કિનારે તણાઈ આવેલી એક વિશાળ ફિન વ્હેલને બચાવીને તેને દરિયામાં પાછી મોકલવાના બચાવકર્તાઓના તમામ પ્રયાસો નિષ્ફળ ગયા હતા અને દુર્લભ બનતી જતી આ વ્હેલનું કરુણ મૃત્યુ થયું હતું.
કોર્નવોલના લિઝાર્ડ પેનિન્સુલા ખાતેના નેર પોઈન્ટના કાંઠે આ વ્હેલ તણાઈ આવી હતી. દરિયાકાંઠે સફાઈ કરી રહેલા કેટલાક સ્વયંસેવકોએ તેને જોઈ હતી અને તેમણે પ્રાણી વિભાગને આ બાબતની જાણ કરી હતી. આ વ્હેલને બચાવવા માટે કેટલાક બચાવ કાર્યકરો આવી પહોંચ્યા હતા. ફિન વ્હેલ તરીકે ઓળખાતી આ વ્હેલનું કદ ઘણું મોટું હતું. તે લગભગ ૬૦ ફૂટ જેટલી લાંબી હતી. દરિયાકાંઠે ઘસડાઈ આવેલી આ વ્હેલના શરીર પર ઠેરઠેર ઘા પડેલા હતા. અને નિષ્ણાતો માને છે કે તેને ઘણા સમયથી કંઈ ખાધું ન હશે, તે ઘણી જ કુપોષિત થઈ ગયેલી લાગતી હતી. બચાવ કાર્યકરોએ તેને બચાવીને ફરીથી દરિયામાં તરતી મૂકવાન પ્રયત્નો કર્યા હતા પણ તે તમામ નિષ્ફળ ગયા હતા.
