વાંચો, આ સપ્તાહે આપના ગ્રહોનું ફળકથન...
• મેષ (અ,લ,ઇ)ઃ આ સમય આપના માટે મિશ્ર પરિણામ આપનારો રહેશે. કોઈક વાર અશાંતિ, બેચેનીનો પણ અનુભવ થાય. કામકાજનું ભારણ વધે. આર્થિક મામલે બેલેન્સ જાળવી શકશો. ધંધાકીય મૂડીરોકાણની જોગવાઈ માટે થોડી વધુ દોડધામ કરવી પડે. જોકે, એમાં સફળતા પણ મળી શકે છે. જમીન-મકાનના કાર્યોમાં ફાયદો થાય. નોકરિયાત વર્ગને થોડી મુશ્કેલીનો સામનો કરવો પડે.
• વૃષભ (બ,વ,ઉ)ઃ નિયમિત જીવનશૈલીમાં હવે બદલાવ જરૂરી બનશે. આળસ ખંખેરીને કામ કરવા લાગી જવાની સલાહ છે. આર્થિક રીતે સપ્તાહ દરમિયાન અણધાર્યા ખર્ચ આવી શકે છે. જોકે, સામે આવકની જોગવાઈ પણ કરી શકશો. કૌટુંબિક મામલે વિવાદ હશે તો તેનો ઉકેલ મળશે.
• મિથુન (ક,છ,ઘ)ઃ સ્વાસ્થ્ય સંબંધિત સમસ્યા સપ્તાહ દરમિયાન વડીલ વર્ગમાં જોવા મળી શકે છે. જોકે, યોગ્ય આહાર અને નિયમિત વ્યાયામ તેમને એમાંથી બહાર લાવી શકશે. આર્થિક મામલે વિચારીને આગળ વધવું. નાહકના ખર્ચાઓ ઉપર નિયંત્રણ જરૂરી રહેશે. વાહન ચલાવતી વખતે થોડી સાવધાની રાખવી.
• કર્ક (ડ,હ)ઃ આ સમય દરમિયાન જો મનને શાંત રાખીને દૃઢતાથી આગળ વધશો તો દરેક સમસ્યાનું સમાધાન શોધવા સક્ષમ બની શકશો. આવકની રીતે હવે થોડીઘણી રાહત રહેશે. જરૂરી નાણાકીય જોગવાઈ કરવા માટે યોગ્ય રસ્તા મળશે. જો આ સમય દરમિયાન મકાન કે કોઈ પ્રોપર્ટી ખરીદીની વાતો ચાલી રહી હશે તો એ ફાયદામાં રહેશો. વ્યવસાય-રોજગાર સંબંધિત કામગીરીમાં થોડી મહેનત વધારી જરૂરી છે.
• સિંહ (મ,ટ): સપ્તાહ દરમિયાન આપના ગ્રહોની સ્થિતિ અને દિશા ઘણાઅંશે તમારી તરફેણમાં રહેશે. જે દરેક કાર્યોની અણધારી સફળતા અપાવશે. આર્થિક રીતે સ્થિતિ વધુ મજબૂત બનતી જોવા મળશે. નોકરીમાં બાકી રહેલા કામકાજને પૂરા કરી શકશો. પ્રમોશનના સંજોગ સર્જાશે. વ્યવસાયિક દૃષ્ટિએ અમુક ફેરફાર જરૂરી રહેશે.
• કન્યા (પ,ઠ,ણ)ઃ આ સપ્તાહે થોડીઘણી માનસિક સમસ્યા વધી શકે છે. શારીરિક સ્વાસ્થ્ય ઉપર નકારાત્મક અસર થઇ શકે છે. નાણાકીય મામલે આ સમયમાં સાવચેતી જરૂરી છે. કોઈને પણ ઉછીના નાણાં આપવાનું ટાળજો. કાર્યક્ષેત્રે કોઈ જાતનું પ્રોમિસ આપતા પહેલાં વિચારવું. વિદ્યાર્થીઓ માટે ડબલ ઉત્સાહભર્યું સપ્તાહ.
• તુલા (ર,ત)ઃ ઘણું વ્યસ્ત સપ્તાહ પસાર થાય. કામકાજનું ભારણ વધે. જોકે, સામે પરિણામ પણ એવું મેળવશો, જે આપને ઉત્સાહિત કરશે. આર્થિક ક્ષેત્રે આ સમયમાં અટવાયેલાં નાણાં પરત મેળવી શકાય. નોકરી-વ્યવસાયમાં તમારા કાર્યોની પ્રશંસા થાય. સહકર્મચારી સાથેના સંબંધોમાં સુધારતા જોવા મળે.
• વૃશ્ચિક (ન,ય)ઃ આપનો આ સમય ઊર્જાથી ભરેલો અને સકારાત્મક રહેશે, જે તમારા કાર્યમાં પણ સફળતા અપાવશે. કારકિર્દીની રીતે જોતાં આ સમયમાં શુભ પરિણામ મેળવશો. વ્યવસાયિક ક્ષેત્રે તમારા વિરોધીઓ સામે વિજયી ડંકો વગાડવામાં સફળ થશો. નોકરીમાં થોડુંઘણું વિવાદિત વાતાવરણ તેમજ કામનું ભારણ તમને બેચેન બનાવી શકે છે. કોર્ટ સંબંધિત કાર્યોમાં વિજયયોગ છે.
• ધન (ભ,ફ,ધ,ઢ)ઃ તમારી અંગત મુશ્કેલીને તમારા કાર્યથી દૂર રાખશો તો ફાવશો નહીં તો ન ઘરના, ન ઘાટના જેવી પરિસ્થિતિમાં ફસાઈ જશો. પાછલી ભૂલોમાંથી બહાર આવીને નવા જોશ અને હોંશથી કામગીરી કરવી જરૂરી. આર્થિક રીતે હજી સમય તમારા પક્ષમાં નથી. છતાં કોઈ મોટી મુશ્કેલી જણાતી નથી.
• મકર (ખ,જ)ઃ આ સપ્તાહના ગ્રહયોગોની અનુકૂળતા તમારી તરફેણમાં રહેશે. જે પણ નવી કામગીરી હાથ ધરવા વિચારી રહ્યા હશો તેમાં અચૂક સફળતા મેળવશો. ફાઈનાન્સિયલી પણ આ સમય ખૂબ હકારાત્મક સાબિત થાય. કૌટુંબિક જવાબદારીમાં પણ વધારો જોવા મળે. માંગલિક પ્રસંગોને કારણે વ્યસ્તતા વધશે. નોકરીમાં બઢતીના યોગ છે.
• કુંભ (ગ,શ,સ,ષ)ઃ આ અઠવાડિયું શારીરિક રીતે તમને વધુ સ્વસ્થ અને મજબૂત બનાવશે. ઘણા સમયથી ચાલતી સમસ્યાનો હવે અંત આવતો જણાય. તમારા પ્રયત્નો સફળ થતાં જોવા મળે. કરિયરલક્ષી નિર્ણયો લેવામાં વડીલોની સલાહથી આગળ વધવું હિતાવહ રહેશે. આર્થિક રીતે મધ્યમ સમય છે. ધંધાકીય કામગીરીમાં ચોક્કસ નીતિ બનાવીને આગળ વધવું.
• મીન (દ,ચ,ઝ,થ)ઃ કોઈની ઉપર અતિવિશ્વાસ રાખી કામ કરશો તો નુકસાની ભોગવશો. નાણાકીય વ્યવહારોમાં શક્ય હોય તેટલી સાવચેતી રાખી આગળ વધશો. નોકરિયાત વર્ગને પ્રગતિ કે ઉચ્ચ હોદ્દાની જગ્યાની હરીફાઈ માટે તનતોડ મહેનત કરવી પડે. વિદ્યાર્થી વર્ગને થોડું સંભાળીને આગળ વધવું. કોર્ટ-કચેરીના કાર્યોમાં થોડો વધુ સમય બરબાદ થાય.
