વાંચો, આ સપ્તાહે આપના ગ્રહોનું ફળકથન...
• મેષ (અ,લ,ઇ)ઃ આ સમય ભાગ્યોદયવાળો રહેશે. દરેક કાર્યોમાં જીવનસાથીનો સહયોગ પ્રાપ્ત કરશો. વ્યવસાયિક ક્ષેત્રોમાં ભાગીદારો થકી લેણાદેણી સારી રહેશે. આવનાર સમયમાં પ્રોપર્ટીને લગતા કામકાજોમાં ફાયદો થાય. નોકરીના ક્ષેત્રમાં થોડી તકેદારી રાખવી. આર્થિક રીતે સમય સારો છે. ગુસ્સા ઉપર થોડુંક નિયંત્રણ રાખશો તો દરેક કાર્યોમાં સફળતા મેળવી શકશો. સ્વાસ્થ્ય સંબંધી સામાન્ય સમસ્યાઓ ચિંતા સતાવશે.
• વૃષભ (બ,વ,ઉ)ઃ આપની મનોસ્થિતિ વધુ મજબૂત બનતાં નવીન એનર્જી અને સ્વસ્થતાનો અનુભવ કરશો. મીડિયા કે કલાક્ષેત્રે કામ કરતી વ્યક્તિઓ માટે આ સમય ખૂબ જ બળવાન કહી શકાય. વ્યવસાયિક કામગીરીમાં થોડી પરેશાનીઓનો સામનો કરવો પડે. નાણાકીય બાબતે સમય મધ્યમ રહેશે. આરોગ્ય બાબતે વિશેષ કાળજી જરૂરી. કોર્ટ-કચેરીના કામમાં નુકશાની વેઠવી પડે. લગ્નવિષયક સમસ્યાનો ઉકેલ મેળવી શકશો.
• મિથુન (ક,છ,ઘ)ઃ આ સમય મિશ્ર ફળદાયક છે. વ્યવસાયિક ધંધાકીય ક્ષેત્રમાં આર્થિક સમસ્યાઓનો સામનો કરવો પડશે. પરિણામે મન પર ભારણનો અનુભવ થાય. બીજી તરફ, કૌટુંબિક જવાબદારીઓ કે માંગલિક પ્રસંગોથી થોડી હળવાશ અનુભવાય. નોકરીના ક્ષેત્રમાં વિરોધીઓ સામે વિજય પ્રાપ્ત થાય. મુસાફરી-પ્રવાસના કારણે વ્યવસાયમાં ફાયદો થાય. કોઈ અંગત વ્યક્તિનો સહયોગ આત્મવિશ્વાસમાં વધારો કરવામાં મદદરૂપ થઈ શકે છે.
• કર્ક (ડ,હ)ઃ કોઈક જૂના મિત્રો સાથે મિલન-મુલાકાતના પ્રસંગો બળવાન બનશે. કાળજીપૂર્વકની યોજનાઓ વ્યવસાયમાં સફળતા અપાવશે. નાણાકીય સ્થિતિ વધુ મજબૂત બનતી જણાય. નોકરીના ક્ષેત્રમાં ઇચ્છિત સ્થાન પ્રાપ્ત કરી શકશો. કૌટુંબિક મિલકતથી લાભ થાય. નવા રોકાણો શક્ય બનશે. સંતાનોના અભ્યાસના પ્રશ્નો હલ થતા જણાય. ધાર્મિક ક્ષેત્રની મુલાકાત પ્રવાસ શક્ય બનશે.
• સિંહ (મ,ટ): આ સમય દરમિયાન વ્યક્તિગત અને વ્યવસાયિક જીવન વચ્ચેનું બેલેન્સ જાળવી રાખવા માટે ખૂબ મહેનત કરવી પડે. કોઈપણ જાતની લાપરવાહી તમારા માટે નુકશાનદાયક પુરવાર થઈ શકે છે. ધંધાકીય બાબતોમાં જે તે નિર્ણય તમે જાતે જ લેવાનું સલાહભર્યું છે. આર્થિક સહાયતા પ્રાપ્ત કરી શકશો. સ્વાસ્થ્યને લઈને પણ થોડી વધુ સજાગતા હવે તમારે રાખવી પડશે. વિઝાને લગતી સમસ્યાઓનું સમાધાન મળશે.
• કન્યા (પ,ઠ,ણ)ઃ જીવનમાં ઉત્સાહ અને આનંદનો ફરી અનુભવ કરી શકશો. કાર્યક્ષેત્ર તેમજ વ્યક્તિગત જીવનમાં સફળતા પ્રાપ્ત કરી શકશો. વ્યવસાયિક કાર્યોમાં પાર્ટનર સાથેના મતભેદ દૂર થાય. આર્થિક સ્થિતિ સુધરતી જોઈ શકશો. વિદ્યાર્થીઓને પરીક્ષાને લઈને થોડું ભારણ રહેશે. કોર્ટ-કચેરીના કાર્યોમાં હજી નિર્ણય આવતાં વાર લાગશે.
• તુલા (ર,ત)ઃ તમારા વિરોધીઓની ગતિવિધિને નંજરઅંદાજ ન કરવાની સલાહ છે. ખાસ કરીને વ્યવસાયિક મામલાઓમાં ખૂબ કાળજી રાખીને કામગીરી કરવાની સલાહ છે. નોકરીમાં આ સપ્તાહ દરમિયાન કામગીરીનું ભારણ વધતું જોવા મળે. જોકે તમે તમારી કામગીરી માટે પ્રશંસા પણ મેળવશો. નવા વાહનની ખરીદી શક્ય બને. નાની યાત્રા કે પ્રવાસની ઇચ્છાઓ પૂર્ણ કરી શકશો.
• વૃશ્ચિક (ન,ય)ઃ સ્વાસ્થ્યને લઈને થોડીઘણી મુશ્કેલીઓનો સામનો કરવો પડશે. જોકે કોઈ ગંભીર સમસ્યા જણાતી નથી. આ સપ્તાહ દરમિયાન નાણાકીય લેવડદેવડમાં ખાસ ધ્યાન રાખશો. શક્ય હોય તો નાણાં ઉધાર લેવાનું ટાળજો. નોકિરયાતને કોઈ સારી જોબ ઓફર પ્રાપ્ત થાય. વ્યાપારિક રીતે આ સમય ઘણો સારો રહેશે. નવી ઓફરો તેમજ નાણાકીય સહાય પ્રાપ્ત કરશો. પ્રવાસ-પર્યટનથી મનોસ્થિતિ થોડી હળવી બનશે.
• ધન (ભ,ફ,ધ,ઢ)ઃ સપ્તાહ દરમિયાન ઘરનું વાતાવરણ અનુશાસિત તથા વ્યવસ્થિત બની રહે તેના માટે મહેનત કરવી પડશે. બાળકોના પ્રશ્નોનો ઉકેલ લાવવા માટે શાંતચિત્તે નિર્ણય લેશો. વ્યવસાયિક કામગીરીમાં યોગ્ય કોમ્યુનિકેશન જાળવશો તો દરેક મુશ્કેલીઓનો નિવેડો લાવી શકશો. નોકરિયાત વર્ગને બઢતીના સંજોગ ઊભા થાય. સ્વાસ્થ્ય સંબંધિત થોડી ચિંતા રહેશે.
• મકર (ખ,જ)ઃ આ સપ્તાહ થોડું બેચેની અને માનસિક તણાવ વાળું પસાર થાય. નાણાકીય લેવડદેવડમાં ખૂબ ધ્યાન રાખીને આગળ વધજો નહીં તો મોટી નુકશાનીમાં ફસાઈ જવાનો વખત આવી શકે છે. વ્યવસાય-ઉદ્યોગમાં હમણાં કોઈ નવા કાર્યની શરૂઆત ન કરવાનું સલાહભર્યું રહેશે. નોકરિયાત વર્ગને પોતાના અધિકાર પ્રાપ્ત કરવા માટે ખૂબ મહેનત કરવી પડશે. નવી નોકરીની શોધખોળમાં સફળતા પ્રાપ્ત કરશો.
• કુંભ (ગ,શ,સ,ષ)ઃ સપ્તાહના પ્રારંભે થોડીઘણી મુશ્કેલીઓનો સામનો કરવો પડે. જોકે અંત સુધીમાં તમારી દરેક સમસ્યાનો ઉકેલ શોધવામાં સફળ થશો. નોકરી-વ્યવસાયમાં કાનૂની દાવપેચમાંથી પસાર થવું પડે. પાર્ટનરશીપથી સંભાળવું. તમારા જીવનસાથી સાથેના સંબંધોમાં સુધારો જોવા મળશે. કોર્ટ-કચેરીના કાર્યમાં વિજય પ્રાપ્ત કરી શકશો. નાની પિકનિકનું આયોજન થાય.
• મીન (દ,ચ,ઝ,થ)ઃ તમારી અંદર રહેલી પ્રતિભા તેમજ ક્ષમતાને બહાર લાવો, જે તમને સફળતાના માર્ગ આગળ લઈ જશે. તમારી વિશેષ ઉપલબ્ધિની ચર્ચા ચારેબાજુ થતી જોવા મળશે. નોકરિયાત વર્ગને કોઈ મહત્ત્વપૂર્ણ પ્રોજેક્ટ પૂરો કરવા માટે દોડધામ વધી જાય. વ્યવસાય ક્ષેત્રે ભાગીદારી થકી ફાયદો થાય. માતા-પિતાના સ્વાસ્થ્યને લઈને થોડી ચિંતાઓ રહેશે. તેમની મેડિસીન અને ડાયેટ ઉપર ખાસ ધ્યાન આપવું જરૂરી.
