JNU હિંસા: ૩૭ની ઓળખ

નવી દિલ્હી: જવાહરલાલ નહેરુ યુનિવર્સિટીમાં થયેલી હિંસાના મામલે દિલ્હી પોલીસની ક્રાઇમ બ્રાન્ચની વિશેષ તપાસ ટીમે ‘યુનિટી અગેન્સ્ટ લેફ્ટ’ નામના એક વોટ્સએપ ગ્રૂપની ઓળખ ૧૧મી જાન્યુઆરીએ કરી લીધી છે અને આ ગ્રૂપમાં ૬૦ મેમ્બર છે. એમાંથી ૩૭ લોકોની ઓળખ થઈ ચૂકી છે. આ સિવાય હિંસા કરવા આવેલા લોકોમાં ૧૦ લોકો બહારના હતા. દરમિયાન પાંચમી જાન્યુઆરીએ જેએનયુ કેમ્પસમાં થયેલી હિંસાના મામલે ત્રણ પ્રોફેસરોએ ૧૩મી જાન્યુઆરીએ દિલ્હી હાઇ કોર્ટમાં એ દિવસના સીસીટીવી ફૂટેજ અને સોશિયલ મીડિયાના ડેટાને સુરક્ષિત રાખવાની કરેલી અપીલના પગલે દિલ્હી સરકાર, દિલ્હી પોલીસ, ગૂગલ, એપલ અને વોટ્સએપને નોટિસ ફટકારી છે અને તેમનો જવાબ માગ્યો છે.