આખરે રૂ. ૫૨ કરોડમાં વેચાયું માલ્યાનું કિંગફિશર હાઉસ

મુંબઇઃ ડેબ્ટ રિકવરી ટ્રિબ્યુનલ આઠ વાર વેચવાના નિષ્ફળ પ્રયાસ પછી આખરે નવમા પ્રયાસમાં વિજય માલ્યાનું કિંગફિશર હાઉસ રૂ. ૫૨.૨૫ કરોડમાં વેચાઈ ગયું છે. મુંબઈની વિલેપાર્લે સ્થિત આ પ્રોપર્ટીને હૈદરાબાદની સેટર્ન રિયલટર્સે ખરીદી લીધી છે. સેટર્ન રિયલટરે આ સોદા માટે મહારાષ્ટ્ર સરકારને રૂ. ૨.૬ કરોડ સ્ટેમ્પ ડ્યૂટી પણ ચૂકવી છે. આ ઈમારતમાં એક બેઝમેન્ટ, એક ગ્રાઉન્ડ ફ્લોર, એક અપર ફ્લોર છે. આશરે ૨૪૦૧.૭૦ ચોરસ મીટરમાં બનેલી આ ઈમારત એક સમયે માલ્યાની કિંગફિશર કંપનીનું હેડક્વાર્ટર હતી. આ પહેલા પણ માલ્યાની દેવાદાર બેંકોએ કિંગફિશર હાઉસ વેચવાનો પ્રયાસ કર્યો હતો, પરંતુ બેંકો તરફથી રિઝર્વ પ્રાઈઝ વધુ રખાઈ હોવાથી તે વેચાઈ શક્યું ન હતું. માર્ચ ૨૦૧૬માં આ ઈમારતની રિઝર્વ પ્રાઈઝ રૂ. ૧૫૦ કરોડ રખાઈ હતી. રિયલ એસ્ટેટ નિષ્ણાતોના મતે, આ ઈમારત મુંબઈ એરપોર્ટના બહારના વિસ્તારમાં છે.