પાવર બેન્ક કૌભાંડનો રેલો ગુજરાતમાં ચાર જ મહિનામાં રૂ. ૨૫૦ કરોડની ઠગાઈ

અમદાવાદ: અમદાવાદ અને ગુજરાત માટે એક-કા-ડબલ જેવા આર્થિક કૌભાંડો નવાં નથી. પણ, કોરોના કાળમાં ઘરબેઠાં મોબાઈલ ફોન એપ્લિકેશનથી એક કા ડબલ કૌભાંડ આચરી દેશના છ રાજ્યના પાંચ લાખથી વધુ લોકોના ૨૫૦ કરોડ રૂપિયાથી વધુ નાણાં ઓળવી જવાયાં છે.
પાવર બેન્ક સહિતની અડધો ડઝન જેટલી મોબાઈલ ફોન એપ્લિકેશનથી રોકાણો મેળવવામાં આવ્યાં. રોકાણ કરનારને મલ્ટીલેવલ માર્કેટિંગ એટલે કે ઓળખીતાના રોકાણ લાવી આપે તો કમિશનની લાલચ આપવામાં આવી. ચાર જ મહિનામાં રૂ. ૨૫૦ કરોડથી વધુ રકમની ઠગાઈ કરી ચાઈનીઝ કૌભાંડી ટોળકીએ આ એપ્લિકેશન આટોપી લીધી છે. દિલ્હી, મુંબઈ, ઉત્તરાખંડ સહિત અડધો ડઝન રાજ્યની પોલીસ આ કૌભાંડની ફરિયાદો નોંધી તપાસ કરી રહી છે. અમદાવાદ-સુરતમાં રોકાણના પૈસાના ઈ-ટ્રાન્સફર અને આ જ પૈસાથી ક્રિપ્ટો કરન્સીની ખરીદી મુદ્દે તેમજ જુનાગઢ-સુરતમાં રોકાણ મેળવતી કંપની હોવા અંગે બીજા રાજ્યની પોલીસે તપાસ કરી છે.
સુરતમાં તો બે યુવકની ધરપકડ પણ કરવામાં આવી છે. ભૂજમાં બે રોકાણકારોએ ફરિયાદ નોંધાવી તે પછી ભૂજ સાયબર ક્રાઈમ બ્રાન્ચે કૌભાંડના મૂળ ચીનમાં હોવાનો ભંડાફોડ પણ કર્યો હતો. પોલીસ પછી એનઆઈએ
અને ઈડી આ આંતરરાષ્ટ્રીય કૌભાંડની તપાસમાં
જોડાનાર છે.