જામજોધપુર કેસમાં સંજીવ ભટ્ટની FRI રદ કરવાનો હાઈકોર્ટનો ઈનકાર

અમદાવાદઃ જામનગર જિલ્લાના જામજોધપુરમાં વર્ષ 1990માં થયેલા તોફાન કેસમાં પોલીસ કસ્ટડીમાં મારવાના મુદ્દે ભૂતપૂર્વ આઈપીએસ અધિકારી સંજીવ ભટ્ટ સામે ફરિયાદ થયેલી છે. આ ફરિયાદને રદ કરવા માટે સંજીવ ભટ્ટ અને અન્ય એક પોલીસ કર્મીએ કરેલી અરજીને હાઈકોર્ટે ફગાવી દિધી છે. હાઈકોર્ટે ચૂકાદામાં નોંધ્યું કે, આ ઘટનાના સંદર્ભે અલગ-અલગ ત્રણ વર્ઝન રેકર્ડ પર છે. હાઈકોર્ટ આ કેસમાં કોઈ દખલ કરતી નથી. સુનાવણી દરમિયાન અરજદારના વકીલની રજૂઆત હતી કે તેઓને તેમના નિવાસસ્થાનેથી ઉઠાવવામાં આવેલા. જ્યાં તોફાનો થયેલા ત્યાં તેઓ હતા જ નહીં. પોલીસ સ્ટેશનમાં લાવ્યા બાદ તેઓને માર મારવામાં આવ્યો હતો. બીજી તરફ સંજીવ ભટ્ટના વકીલની રજૂઆત હતી કે, જામજોધપુરમાં થયેલા તોફાનો સમયે આ ફરિયાદ થયેલી છે. જેથી સીઆરપીસીની કલમ 132 હેઠળ સરકારી કર્મચારી  તરીકે તેમને રક્ષણ મળે છે. આ સમયે સ્થિતિને શાંત કરવા પગલા લીધા હતા, ભૂતકાળમાં ફરિયાદીએ રજૂઆત કરેલી કે તે ફરિયાદ રદ કરવા માંગે છે, જો કે બાદમાં તેણે આ નિર્ણય બદલ્યો હતો અને હાઈકોર્ટને જાણ કરી હતી. મહત્વનું છે કે આઈપીએસ સંજીવ ભટ્ટ 1990ના રમખાણો દરમિયાન જામજોધપુરમાં પોલીસ ઈન્સ્પેક્ટર તરીકે ફરજ બજાવતા હતા.