ચૂંટણી પંચ ઘરેલુ પરપ્રાંતીય મતદારો માટે નવી સુવિધા શરૂ કરવા જઈ રહ્યું છે. આ હેઠળ હવે ચૂંટણી દરમિયાન સ્થળાંતરિત મતદારોએ તેમના મત આપવા માટે પોતાના ગૃહ રાજ્યમાં જવું પડશે નહીં. ચૂંટણી પંચ આ માટે રિમોટ વોટિંગ સિસ્ટમ શરૂ કરવા જઈ રહ્યું છે. આ માટે ચૂંટણી પંચે રિમોટ ઈવીએમનો પ્રોટોટાઇપ તૈયાર કર્યો છે. પંચે 16 જાન્યુઆરીએ તમામ પક્ષો માટે તેનો લાઇવ ડેમો પણ રાખ્યો છે. ચૂંટણી પંચે ગુરુવારે જણાવ્યું હતું કે, તેણે ઘરેલુ સ્થળાંતરિત મતદારો માટે મલ્ટિ-વિભાગના રિમોટ ઈવીએમ તૈયાર કર્યાં છે. તે એક જ રિમોટ પોલિંગ બૂથથી 72મત વિસ્તારોને સંભાળી શકે છે.
EC એ રાજકીય પક્ષો પાસેથી સૂચનો માગ્યાં
ચૂંટણી પંચે તમામ રાજકીય પક્ષોને 16 જાન્યુઆરીએ લાઈવ ડેમો માટે બોલાવ્યા છે. તમામ પક્ષો અને હિતધારકોના પ્રતિસાદ અને પ્રોટોટાઇપના પ્રદર્શનના આધારે ચૂંટણી પંચ રિમોટ વોટિંગ સિસ્ટમ લાગુ કરવાની પ્રક્રિયા આગળ ધપાવશે. તેના અમલીકરણમાં કાયદાકીય, વહીવટી અને ટેકનિકલ પડકારો અંગે રાજકીય પક્ષોનાં મંતવ્યો પણ માગવામાં આવ્યાં છે.
શું કહ્યું ચૂંટણી પંચે ?
ચૂંટણી પંચે એક નિવેદનમાં જણાવ્યું હતું કે, 2019ની સામાન્ય ચૂંટણીમાં 67.4% મતદાન થયું હતું. 30 કરોડથી વધુ મતદારોએ પોતાનો મત આપ્યો ન હતો. ચૂંટણીપંચે આ અંગે ચિંતા વ્યક્ત કરી છે. ચૂંટણી પંચે કહ્યું કે, મતદાતા ઘણા કારણોસર નવા રહેઠાણની નોંધણી કરાવી શકતા નથી. આવી સ્થિતિમાં તે મતદાનના અધિકારનો ઉપયોગ કરી શકે નહીં. મતદાનની ટકાવારી સુધારવા અને ચૂંટણીમાં તેમની ભાગીદારી સુનિશ્ચિત કરવા માટે ઘરેલુ સ્થળાંતર કરનારાઓની મત આપવા માટે અસમર્થતા એ એક મુખ્ય કારણ છે. જો કે દેશની અંદર સ્થળાંતર કરનારાઓનો કોઈ કેન્દ્રીય ડેટાબેઝ નથી. ઉપરાંત પબ્લિક ડોમેઇનમાં ઉપલબ્ધ ડેટા અનુસાર, નોકરી, કામ, લગ્ન અને શિક્ષણ ઘરેલુ સ્થળાંતરનું કારણ છે.