અમદાવાદ એરપોર્ટ પર દાણચોરીનું નવું હબ વૉશરૂમ

અમદાવાદઃ સોનાની દાણચોરીનું હબ બની ગયેલા અમદાવાદ એરપોર્ટ પર દુબઈથી લોડરની મદદથી કસ્ટમ ડ્યૂટી ભર્યા વિના બારોબાર સોનું વેચવાનું રેકેટ પકડી લેવાયું છે. આ રેકેટમાં એરપોર્ટ કસ્ટમ્સના કેટલાક અધિકારીઓ અને કર્મચારીઓની મિલીભગત હોવાનો પણ ઘટસ્ફોટ થયો છે. અગાઉ સોનાની દાણચોરીમાં કસ્ટમ ઇન્સ્પેક્ટર, એરલાઇન્સ સ્ટાફની સંડોવણી બહાર આવી ચૂકી છે. એરપોર્ટ પર સોનાની દાણચોરી માટે એરપોર્ટ એરાઇવલના ‘વૉશરૂમ’નો ઉપયોગ થઈ રહ્યો છે. એરપોર્ટ સૂત્રોના મતે આ મોડસ ઓપરેન્ડીથી અત્યાર સુધી અનેકવાર મોટી માત્રામાં સોનું એરપોર્ટ બહાર કાઢી દેવાયું છે. એરપોર્ટના એરાઇવલનો વૉશરૂમ એવી જગ્યાએ બનાવાયો છે, જ્યાંથી સોનાની સરળતાથી દાણચોરી કરી શકાય છે. આમ અમદાવાદ એરપોર્ટ પર ગેરકાયદે સોનું ઘુસાડીને અત્યાર સુધી કરોડોની ડ્યૂટી ચોરી કરાઈ હોઈ શકે છે. સુરક્ષા એજન્સીઓનાં સૂત્રોના મતે સોનાની દાણચોરીમાં એરપોર્ટ-કસ્ટમના અધિકારી, કર્મચારીની પણ શંકાસ્પદ ભૂમિકા છે.

આ છે સોનાની દાણચોરી માટેની મોડ્સ ઓપરેન્ડી
એરપોર્ટ સુરક્ષા સાથે સંકળાયેલી એજન્સીઓનાં સૂત્રોના મતે સોનાની દાણચોરી કરવા અવનવી મોડ્સ ઓપરેન્ડી અજમાવાઈ રહી છે. એરપોર્ટના સ્ટ્રક્ચર મુજબ વિદેશથી આવનારા મુસાફરો ફ્લાઇટમાંથી એરોબ્રિજ મારફતે બહાર આવે છે. ટર્મિનલમાં પ્રવેશ કરતાં જ સીડીથી નીચે ઉતરી ઇમિગ્રેશન વિભાગમાં જાય છે. એ પહેલાં જમણી બાજુ વૉશરૂમ છે. જે મુસાફર સોનું લઈને આવ્યો હોય તે અંદર જતો રહે છે. વળી અહીં સીસીટીવી પણ ન હોવાથી પકડાઈ જવાનો ડર નથી. અહીં વૉશરૂમના ડસ્ટબિન કે અન્ય જગ્યાએ સોનું મૂકી દેવાય છે. ત્યાર પછી કેરિયર કે મુસાફર ટર્મિનલની બહાર નીકળીને કસ્ટમ્સ અધિકારીઓ, એરલાઇન્સના અન્ય કર્મચારીઓનો સંપર્ક કરી લોડરો કે સફાઈકર્મીની મદદથી સોનું બહાર કાઢી દે છે.
સમયાંતરે અધિકારીની બદલી કરાય છે
કેટલાક કેસમાં કસ્ટમ્સ સુપરિન્ટેન્ડેન્ટની સંડોવણી બહાર આવ્યા બાદ તમામ સ્ટાફની બદલી કરી દેવામાં આવી હતી, એરપોર્ટ પર કેરિયર્સ સાથે ચેનલ ન ગોઠવાય તે માટે એરપોર્ટ કસ્ટમ વિભાગમાં અમુક સમયના અંતરે અધિકારીઓની બદલી કરી દેવામાં આવે છે.
મોટાભાગના કેસ ડીઆરઆઇએ કર્યા હતા
થોડા વખત પહેલાં અમદાવાદના આંતરરાષ્ટ્રીય એરપોર્ટ પર સતત સોનાની હેરાફેરી થતી હતી. આમ મોટાભાગના દાણચોરીના કેસ ડિરેક્ટોરેટ રેવન્યુ ઓફ ઇન્ટેલિજન્સ (ડીઆરઆઇ) દ્વારા કરવામાં આવ્યા હતા અને કેરિયર્સની સિન્ડિકેટનો પર્દાફાશ થયો હતો.
ટોઇલેટમાંથી સફાઈકર્મીને કિલો સોનું મળ્યું
હજુ થોડા દિવસ પહેલાં જ એક 21 વર્ષીય સફાઈકર્મીને અમદાવાદ એરપોર્ટના ટોઇલેટમાંથી એક કિલો સોનું મળ્યું હતું. તે તેણે કસ્ટમ્સને સુપરત કરી દીધું હતું. આ પ્રામાણિકતા બદલ તેને ઇનામ આપીને પણ સન્માનિત કરાયો હતો.