નવી દિલ્હીઃ ભારતે હવે જી-20નું અધ્યક્ષપદ સંભાળ્યું છે. આ સાથે જ ભારતમાં જી-20 સમિટની બેઠકો યોજવા માટેનું આયોજન શરૂ થઇ ગયું છે. ભારતમાં પહેલી ડિસેમ્બરથી જી-20ની વિવિધ બેઠકો યોજાવાનું શરૂ થશે, જે આખું વર્ષ ચાલશે. દેશમાં કાશ્મીર સહિત અનેક સ્થળો પર આ બેઠકો યોજવામાં આવશે.
ઉલ્લેખનીય છે કે ભારતના અધ્યક્ષપદ હેઠળ જી-20ની બેઠકો માટે તાજેતરમાં વડા પ્રધાન મોદીએ એક ઓનલાઈન કાર્યક્રમમાં કમળ સાથેનો નવો લોગો, થીમ અને વેબસાઈટ લોન્ચ કર્યા હતા. જી-20 દુનિયાના વિકસિત અને વિકાસશીલ 20 દેશોનું એક જૂથ છે, જેમાં ભારત, અમેરિકા સહિતના દેશોનો સમાવેશ થાય છે. જી-20 જૂથમાં સામેલ દેશોના અર્થતંત્ર દુનિયાના 85 ટકા જીડીપી સમકક્ષ છે અને આંતરરાષ્ટ્રીય વેપારમાં તેમનો હિસ્સો 75 ટકા છે.
જી-20 જૂથમાં આર્જેન્ટિના, ઓસ્ટ્રેલિયા, બ્રાઝિલ, કેનેડા, ચીન, ફ્રાન્સ, જર્મની, ભારત, ઈન્ડોનેશિયા, જાપાન, દક્ષિણ કોરિયા, મેક્સિકો, રશિયા, સાઉદી અરબ, દક્ષિણ આફ્રિકા, તૂર્કી, બ્રિટન, અમેરિકા અને યુરોપિયન યુનિયનનો સમાવેશ થાય છે.
