સુરતઃ અશક્ત માણસને પણ પ્રેમ એટલું પ્રોત્સાહન પૂરું પાડે છે કે તે કંઈપણ કરી જાય છે. કંઈક આવું જ બન્યું સુરતમાં રાંદેરના ગોરાટ રોડ પર રહેલાં 60 વર્ષનાં વૃદ્ધા અફસાના ગોડિલ સાથે. ત્રણ દીકરીઓનાં લગ્ન બાદ પતિ સાથે અફસાના એકલાં જ રહેતાં હતાં. જો કે તેમના પતિનું પણ કોરોનાકાળમાં અવસાન થતાં તેઓ એકલવાયું જીવન જીવતાં હતાં. આ સંજોગોમાં તેમને પ્રેમ અને હૂંફની ખૂબ જરૂર હતી, પરંતુ તેમની સાથે કોઈ હતું જ નહીં. લગ્ન કરી બે દીકરીઓ વિદેશ સ્થાયી થઈ હતી, જ્યારે એક દીકરી સુરતમાં જ અન્ય સ્થળે સ્થાયી થઈ હતી.
વિદેશમાં સ્થાયી થયેલી દીકરીઓ સાથે તો તેઓ ક્યારેક વાત કરી લેતાં હતાં, પરંતુ તેમના પૌત્રીઓ ગુજરાતી કે હિન્દી જાણતાં ન હોવાથી તેમની સાથે વાત કરવામાં તેઓ અસમર્થ હતાં, જેમનું તેમને દુઃખ હતું. પૌત્રીઓ સાથે પોતાની લાગણી વ્યક્ત કરવામાં અસમર્થ અફસાનાબહેન આ વાતને લઈને નિરાશ ન થઈ અંગ્રેજીના ક્લાસીસમાં જોડાયાં અને અંગ્રેજી શીખ્યાં. પૌત્રીઓ સાથે શાબ્દિક લાગણી વ્યક્ત કરવાની તેમની ઇચ્છા એટલી બળવતર બની તે તેઓ એક મહિનામાં જ કડકડાટ અંગ્રેજી શીખી ગયાં. અમુક શબ્દો શીખ્યા બાદ તેઓએ વિદેશ રહેતી પૌત્રીઓને પહેલો કોલ કરીને કહ્યું હતું, ‘હાઉ આર યુ ડીઅર.’ નાનીનું અંગ્રેજી સાંભળીને પૌત્રીઓ ખુશ થઈ ગઈ હતી. આજે એ સ્થિતિ છે કે, અસફાનાબહેન એક-એક કલાક સુધી પૌત્રીઓ સાથે વાત કરે છે.
અસફાનાબહેન કહે છે કે, ‘હું એકલી જ રહું છું. દીકરીઓ સાથે તો વાત કરી લેતી હતી, પરંતુ પૌત્રીઓ સાથે વાત કરવામાં તકલીફ પડતી હતી. એક નાની તરીકે મારે પૌત્રીઓ પ્રત્યે વિશેષ હેત હોય એ સ્વાભાવિક છે. તેઓ અંગ્રજી બોલતાં હોઈ મેં પણ નક્કી કર્યું કે હું પણ અંગ્રેજી શીખીને તેમની સાથે વાત કરીશ. મારા પતિની પણ ઇચ્છા હતી કે હું અંગ્રેજી શીખું.
