થાઇલેન્ડ બાદ મલેશિયાએ પણ ભારતીયો માટે વિઝામુક્ત એન્ટ્રી કરી

આર્થિક વૃદ્ધિ માટે હવે મલેશિયા પણ શ્રીલંકા અને થાઇલેન્ડના માર્ગ પર આગળ વધ્યું છે. મલેશિયાએ પણ ભારતીય નાગરિકોને 30 દિવસ માટે નિઃશુલ્ક વિઝા આપવાની જાહેરાત કરી છે.

• બારામુલ્લાથી લશ્કરના 3 આતંકી સહયોગીની ધરપકડ: જમ્મુ-કાશ્મીરના બારામુલ્લાથી સુરક્ષાદળોએ લશ્કર-એ-તોઇબા સાથે સંકળાયેલા 3 આતંકી સહયોગીની ધરપકડ કરી છે. તેમની પાસેથી હથિયાર, દારૂગોળો સહિતની સામગ્રી જપ્ત કરાઈ છે.

• દુર્લભ બીમારીની રૂ. 2.2 કરોડની દવા રૂ. 5 લાખમાં મળશે: ભારતમાં 4 દવાના માર્કેટિંગની મંજૂરી અપાતાં દુર્લભ બીમારી સામે ઝઝૂમી રહેલા દર્દીઓને આયાતી મોંઘી દવા સામે સસ્તી દવા મળશે. જે અંતર્ગત રૂ. 2.2 કરોડની કિંમતની દવા રૂ. 2.5 લાખથી રૂ. 5 લાખમાં જ મળી રહેશે.

• આદિત્ય એલ-1 તેના લક્ષ્યની નજીક પહોંચ્યું: સૂર્યના અભ્યાસ માટે મોકલવામાં આવેલા ભારતના પ્રથમ અંતરીક્ષ યાન આદિત્ય એલ-1 પોતાના છેલ્લા ચરણમાં છે અને આ યાન ટૂંક સમયમાં જ પોતાના લક્ષિત પોઇન્ટ સુધી પહોંચી જશે.

• પતંજલિ યોગપીઠ અને ભારતીય સેના વચ્ચે સમજૂતી: હવે ભારતીય સેનાના જવાનોને પણ બાબા રામદેવના યોગ, આયુર્વેદ ઉપચાર અને વેલનેસનો લાભ મળશે. વાસ્તવમાં પતંજલિ યોગપીઠે ભારતીય સેના સાથે એમઓયુ કર્યા છે.

• નિવૃત્ત સૈનિકોને આતંકી બનાવતું પાકિસ્તાન: કલમ 370 દૂર કર્યા પછી જમ્મુ-કાશ્મીરમાં આતંકી બનનારા યુવાનોની સંખ્યા નહિવત્ થઈ ગઈ હોવાથી પાકિસ્તાન તેના નિવૃત્ત સૈનિકોને આતંકી બનાવી જમ્મુ-કાશ્મીરમાં ઘુસાડી રહ્યું છે.

• તાજ હોટેલમાંથી 15 લાખ ગ્રાહકોનો પર્સનલ ડેટા લીક: ટાટા ગ્રૂપની માલિકીની તાજ હોટેલમાંથી ડેટા લીક થવાનો મામલો સામે આવ્યો છે. રિપોર્ટ અનુસાર ડેટા લીકમાં લગભગ 15 લાખ લોકોની અંગત માહિતી લીક થઈ છે.

• મધ્ય-પૂર્વમાં વિમાનોના જીપીએસ સિગ્નલ ગાયબ થવાની ઘટનામાં વધારો: મધ્ય-પૂર્વમાં ઇઝરાયલ અને હમાસ યુદ્ધ વચ્ચે ગ્લોબલ નેવિગેશન સેટેલાઇટ સિસ્ટમના જામ થવાના કિસ્સા વધતાં ડીજીસીએએ એરલાઇન્સને ચેતવણી આપી છે.

• નીરવ મોદી સાથે સંકળાયેલી 18 મિલકતો રિલીઝ કરવા આદેશ: પીએનબી કૌભાંડ કેસમાં ભાગેડુ નીરવ મોદી અને તેની કંપનીઓની રૂ. 71 કરોડથી વધુ કિંમતની 18 સંપત્તિને બેન્ક અને લિક્વિડેટર્સના પક્ષે મુક્ત કરવા બુધવારે આદેશ કર્યા હતા.

• પ્રધાનમંત્રી પર વિવાદિત ટિપ્પણી મુદ્દે રાહુલને નોટિસ: રાહુલ ગાંધીએ રાજસ્થાનમાં પ્રધાનમંત્રીને પનોતી કહેતાં ઇલેક્શન કમિશન ઓફ ઇન્ડિયાએ રાહુલ ગાંધીને નોટિસ ફટકારી જવાબ માગ્યો છે.

• સાંસદ લોગઇન-પાસવર્ડ કોઈને નહીં આપી શકે: સાંસદ મહુઆ મોઇત્રા સામેના કેશ ફોર ક્વેરી કેસ બાદ સાંસદ લોગઇન-પાસવર્ડ કોઈને નહીં આપી શકે. લોગઇન થતાં જ તેના મોબાઇલમાં આવેલા ઓટીપીથી જ તેને ઓપરેટ કરી શકાશે.