અમદાવાદઃ જૂનાગઢના સુપ્રસિદ્ધ ગિરનાર પર આવેલા અંબાજી માતાજીના મંદિર અને દત્તાત્રેય ભગવાનના મંદિરની આસપાસ ગંદકી અને બિન આરોગ્યપ્રદ વાતાવરણને લઈ ગુજરાત હાઇકોર્ટમાં દાખલ થયેલી જાહેરહિતની અરજીમાં હાઇકોર્ટે જણાવ્યું હતું કે, ગિરનાર પરનાં મંદિરો આસપાસ ગંદકી - પ્રદૂષણ ચલાવી નહીં લેવાય. હાઇકોર્ટે અભયારણ્યમાં પ્લાસ્ટિકના વપરાશ પર પ્રતિબંધની કડક અમલવારીનો રાજ્ય સરકારને નિર્દેશ કર્યો. સાથે અભયારણ્ય વિસ્તારમાં પ્લાસ્ટિક ઉત્પાદન, પેદાશ, ઉપયોગ પર પ્રતિબંધ ફરમાવ્યો હતો. હાઇકોર્ટે અભયારણ્યમાં પ્લાસ્ટિક સાથે પ્રવેશ પર, કચરો ફેંકવા પર પ્રતિબંધ ફરમાવ્યો હતો. ઉપરાંત રાજ્ય સરકાર પાસેથી 1 જુલાઈ સુધી અહેવાલ પણ માગ્યો છે.
