અમદાવાદઃ ટેક્નોલોજી અને ટેલિકોમ્યુનિકેશન માટે જગવિખ્યાત કંપની એપલમાં ઘણા સમયથી મોટા ફેરફાર કરવામાં આવી રહ્યા છે. કેટલાક વિભાગોમાં છટણી કરવામાં આવ્યાના સમાચાર થોડા સમય પહેલાં વહેતા થયા હતા ત્યાં હવે કેટલાક વિભાગમાં નવા વડાની નિમણુંક કરાયાના સમાચાર આવ્યા છે. તાજેતરમાં આવેલા સમાચાર અમદાવાદીઓ માટે ગર્વ સમાન છે. એપલ દ્વારા હાર્ડવેર ટીમમાં ધરખમ ફેરફાર કરાયો છે. તેમાં એકોસ્ટિક્સ વિભાગના વડા ગેરી ગીવ્સને ખસેડીને નવા વડા તરીકે ગરવા ગુજરાતીની નિમણુંક કરાઈ છે.
એલ.ડી. એન્જિનિયરિંગના ભૂતપૂર્વ વિદ્યાર્થી
ગેરીના સ્થાને મૂળ અમદાવાદના વતની રુચિર દવેની નિમણુંક કરાઈ છે. રુચિર દવે અમદાવાદની જાણીતી એલ.ડી. એન્જિનિયરિંગ કોલેજના વિદ્યાર્થી હતા. તે 2009માં એપલમાં એન્જિનિયર તરીકે જોડાયા હતા અને હવે ત્યાં જ એક ડિવિઝનના વડા બની ગયા છે. ઉલ્લેખનીય છે કે, ગેરી લગભગ તેર વર્ષથી એપલના એકોસ્ટિક્સ વિભાગના વાઇસ પ્રેસિડેન્ટપદે હતા. ગેરીનો અનુગામી બનેલા રુચિર દવે પાલડીની શારદામંદિર સ્કૂલના 1982થી 1994 સુધી વિદ્યાર્થી હતા. આ પછી તે 1998માં એલ.ડી. કોલેજ ઓફ એન્જિનિયરિંગમાંથી સ્નાતક થઇ યુએસની પેન સ્ટેટ યુનિવર્સિટીમાં ભણવા ગયા હતા.
ઓડિયો સેગમેન્ટમાં નિપુણતા
એપલની હાર્ડવેર ટીમમાં 300 જેટલા કર્મચારીઓનો સમાવેશ થાય છે અને તેઓ કંપનીના ઉત્પાદનો હોમપોડ, એરપોડ્સ અને સ્પિકરના બિઝનેસને ધમધમતો રાખે છે. આ ટીમ દ્વારા સાઉન્ડ અને માઇક્રોફોન ટેકનોલોજીમાં થતાં નવા આવિષ્કારોને પણ આત્મસાત કરે છે. વિશિષ્ટ સોફ્ટવેર ફિચર બનાવવાનું કામ આ ટીમને ફાળે આવે છે. મૂળ અમદાવાદી એવા રુચિર દવે એપલમાં 13 વર્ષથી કામ કરે છે. હવે તેઓ એકોસ્ટિક્સના વાઇસ પ્રેસિડેન્ટ તરીકે એરપોડ્સ અને મેકસ સહિતના ઉત્પાદનોના ઓડિયો ફિચર્સ ઉપર દેખરેખ રાખશે. તેના ડિવિઝનની એરપોડ્સ અને મેકના ઓડિયો સેગમેન્ટમાં માસ્ટરી છે.
રુચિર 2009માં એપલમાં એકોસ્ટિક્સની એન્જિનિયર ટીમમાં જોડાયા પહેલાં તેમણે સિસ્કો કંપનીમાં એક દાયકા સુધી કામ કર્યું હતું. એપલમાં જોડાયા બાદ મે 2012માં તેને બઢતી આપીને મેનેજર બનાવાયા હતા. એ પછી માર્ચ 2021માં રુચિર દવેની સિનિયર ડાયરેક્ટર તરીકે નિમણૂક થઈ. એપલ દ્વારા આ અંગે સત્તાવાર જાહેરાત કરાઇ નથી, પરંતુ તેના કર્મચારીઓમાં સમાચાર ફેલાઇ ગયા છે. એપલમાં ઘણાં ભારતીયો કામ કરે છે પણ આટલો લાંબો સમય કંપનીમાં રહીને જ સતત પ્રમોશન મેળવનારા રુચિર જેવા પ્રતિભાશાળી એન્જિનિયર્સ બહુ ઓછા છે.
