અમદાવાદઃ હરણી બોટ દુર્ઘટનામાં સુઓમોટો અરજી પરના પોતાના હુકમમાં ચીફ જસ્ટિસની ખંડપીઠે ચોકાવનારું અવલોકન કર્યું છે કે, હરણી તળાવમાં બોટ દુર્ઘટના બની તેનો કોન્ટ્રાક્ટ મેળવવા તદ્દન ગેરલાયક ઠેરવાયેલા કોરિયા પ્રોજેક્ટને આ કોન્ટ્રાક્ટ આપવામાં બે પૂર્વ મ્યુનિસિપલ કમિશનર એચ.એસ. પટેલ અને વિનોદ રાવની સ્પષ્ટ ભૂમિકા રહી હોવાનું રિયોર્ટમાં સ્પષ્ટ થયું છે.
કોર્ટે ટેન્ટેટિવ ઓપિનિયન આપતાં જણાવ્યું કે, આ બંને અધિકારીએ પોતાની કરજમાં બેદરકારી દાખવી છે અને તેમને મળેલી સત્તાનો દુરુપયોગ કર્યો છે. આથી સામાન્ય વહીવટ વિભાગે આ બંને અધિકારી સામે શિસ્તભંગનાં પગલાં ભરવાં જોઈએ.
ઉલ્લેખનીય છે કે, 18 જાન્યુઆરીએ વડોદરાના હરણી તળાવમાં સ્કૂલના વિદ્યાર્થીઓ સાથેની બોટ પલટી ખાઈ જતાં 12 વિદ્યાર્થી અને 2 શિક્ષકો સહિત 14નાં મૃત્યુ થયાં હતાં, જે અંગે હાઇકોર્ટે સુઓમોટો અરજી દાખલ કરી હતી.
