અમદાવાદઃ શેરબજારમાં રોકાણ કરતાં યુનિક ઇન્વેસ્ટરની સંખ્યા ગુજરાતમાં 1 કરોડને પાર થઈ ગઈ છે. નેશનલ સ્ટોક એક્સચેન્જ દ્વારા જાહેર કરાયેલા રિપોર્ટ મુજબ, 1 કરોડ ઈન્વેસ્ટર પાર કરનારું ગુજરાત દેશનું ત્રીજું રાજ્ય બન્યું છે.
આ પહેલાં મહારાષ્ટ્ર (1.86 કરોડ) અને ઉત્તરપ્રદેશ (1.31 કરોડ) આ માઇલસ્ટોન મેળવી ચૂક્યાં છે. ગુજરાતમાં કુલ રોકાણકારોમાંથી 27.8 ટકા એટલે કે 27.94 લાખ મહિલા છે, જે મહારાષ્ટ્ર બાદ બીજા ક્રમે છે. આ ટોપ-3 રાજ્યમાં જ દેશના 36 ટકા રોકાણકાર છે. છેલ્લા એક દાયકામાં ગુજરાતમાં રોકાણકારોની સંખ્યા 5 ગણી એટલે કે 80 લાખ વધી છે. 2014-15માં ગુજરાતમાં રોકાણકારોની સંખ્યા 20.55 લાખ હતી, જે 2025-26 મે સુધી 1 કરોડને પાર થઈ છે.
1 કરોડ ઇન્વેસ્ટર સાથે ગુજરાતની દેશમાં ભાગીદારી 8.7 ટકા છે, પરંતુ છેલ્લાં 5 વર્ષમાં રાજ્યની હિસ્સેદારી 3.5 ટકા ઘટી છે. 2019-20માં દેશના 12.2 ટકા એટલે કે 38 લાખ રોકાણકારો ગુજરાતથી હતા. હાલમાં મહારાષ્ટ્ર 16.2 ટકા ઇન્વેસ્ટર્સ પ્રથમ અને ઉત્તરપ્રદેશ 11.4 ટકા સાથે બીજા ક્રમે છે. આ ઉપરાંત પશ્ચિમ બંગાળ 5.9 ટકા એટલે કે 67.61 લાખ અને રાજસ્થાન 5.7 ટકા એટલે કે 65.65 લાખ રોકાણકાર સાથે પાંચમા ક્રમે છે. ગુજરાતની હિસ્સેદારી ઘટવા પાછળ આ બંને શહેરોમાં નવા ઉમેરાતા રોકાણકારોની ઓછી સંખ્યા છે.
ગુજરાતમાં 13 લાખ રોકાણકારો મહિનામાં ઓછામાં ઓછું એકવાર તો ટ્રેડિંગ કરે જ છે. આ મામલે મહારાષ્ટ્ર બાદ ગુજરાત બીજા ક્રમે છે. 2025માં જાન્યુઆરીથી મે દરમિયાન ગુજરાતમાં 3.70 લાખ નવા રોકાણકારો જોડાયા છે.
