સુરતઃ 27 મેએ ઉધના પોલીસે વાહન ચેકિંગમાં બે શખ્સોને પકડી પાડી સાઇબર ફ્રોડનું ઇન્ટરનેશનલ રેકેટ પકડી પાડ્યું હતું. આ કેસમાં હવે નવો ઘટસ્ફોટ થયો છે. તપાસ દરમિયાન પોલીસને 164 બેન્ક એકાઉન્ટ મળ્યાં છે, જે પૈકી RBL બેન્કના 89 એકાઉન્ટથી માત્ર 6 મહિનામાં કુલ રૂ. 1,445 કરોડનાં ટ્રાન્ઝેક્શન થયાં છે. જ્યારે હજુ 75 બેન્ક એકાઉન્ટનું વેરિફિકેશન કરવાનું હોવાથી આ આંકડો વધી શકે છે. તમામ બેન્ક એકાઉન્ટ સુરત શહેરમાં ખોલાયાં હતાં. આ બેન્ક એકાઉન્ટની વિગતોમાં સિંગાપોર, મલેશિયા, ક્યુબા અને થાઇલેન્ડના મોબાઇલ નંબર અપાયા હતા.
ક્યુબાથી મળતો હતો કમાન્ડ
આ ઇન્ટરનેશનલ સાઇબર ફ્રોડમાં ક્યુબાથી કમાન્ડ મળતો ને કમિશનનો ખેલ શરૂ થતો હતો. આ કેસના આરોપીઓ કિરાત જાદવાણી, દિવ્યેશ અને મીત ખોખર દેશભરમાં થતા ડિજિટલ એરેસ્ટ સહિતનાં સાઇબર ફ્રોડનાં નાણાં 164 બેન્ક એકાઉન્ટમાં મેળવતા હતા. આ કામ માટે આરોપીઓને ક્યુબાથી 'રિચ પે' નામના ટેલિગ્રામ એકાઉન્ટથી કમાન્ડ મળતો હતો. તમામ બેન્ક એકાઉન્ટ કરંટ હતાં અને તેમને કમિશન પર લઈ સાઇબર ફ્રોડનાં નાણાંનું ટ્રાન્ઝેક્શન કરતા હતા.
તેઓ સાઇબર ફ્રોડનાં નાણાં બેન્ક એકાઉન્ટમાં મેળવતા હતા. ત્યારબાદ બેન્ક એકાઉન્ટની વિગતો રેઝર એક્સ એપથી ક્યુબા મોકલતા હતા. આ પૈસા બીજા એકાઉન્ટમાં ટ્રાન્સફર કરી દેતા અને કમિશન કાપીને આ પૈસા USTDમાં કન્વર્ટ કરવામાં આવતા હતા. જેના કમિશન પેટે આરોપીઓ કરોડો કમાયા હતા.
