એકમાત્ર ગામ જ્યાં રક્ષાબંધને બહેનો ભાઈને રાખડી બાંધતી નથી

પાટણઃ દેશભરમાં રક્ષાબંધન શ્રાવણ સુદ પૂનમના દિવસે ઊજવાય છે, પરંતુ પાટણના સમી તાલુકાના ગોધાણા ગામે છેલ્લાં 250 વર્ષથી શ્રાવણ સુદ પૂનમના દિવસે રક્ષાબંધન ઊજવાતી નથી. વર્ષોથી ચાલી આવતી આ પરંપરા આજેપણ અકબંધ છે અને આ ગામની તમામ બહેનો ભાદરવી તેરસે ભાઈઓને રાખડી બાંધી રક્ષાબંધન ઊજવે છે.
ગ્રામજનોએ જણાવ્યું કે, ગામમાં અઢીસો વર્ષ પહેલાં રક્ષાબંધનના દિવસે ગામના 4 બળેવિયા તળાવમાં નાળિયેર લેવા જતા ડૂબી ગયા હતા. જો કે ચમત્કારિક રીતે આ 4 યુવાનો ભાદરવા સુદ તેરસના દિવસે તળાવથી જીવિત બહાર આવ્યા હતા. તેથી આ દિવસે બહેનો અધૂરી રક્ષાબંધનની ઉજવણી પૂર્ણ કરે છે.