નખત્રાણાઃ હવે કચ્છ જિલ્લાથી પણ ‘ગોલ્ડન સ્ટોન’ મળી રહ્યા છે, જેની આરબ દેશોમાં સુશોભન તરીકે ભારે માગ છે અને વિશેષ ક્રેઝ જોવા મળી રહ્યો છે. નખત્રાણાના પાવરપટ્ટી વિસ્તારમાં આવેલા પાલનપુર-બાડી ગામની સીમમાં આવેલા વોકળામાં સોના જેવા ચળકતા પથ્થરો જોવા મળી રહ્યા છે. આ વોકળો જે ઝુરા ગામના ડુંગરોથી આવે છે તે ‘સોનવો’ અને ‘સોનજર’ તરીકે પણ જાણીતો છે. સ્થાનિક લોકોમાં આ પથ્થરોને લઈને ઉત્સુકતા જોવા મળી રહી છે અને તેઓ સરકાર દ્વારા સંશોધન થાય તેવી માગ કરી રહ્યા છે. આ પથ્થર તોડવામાં આવે ત્યારે તેમાંથી સોના જેવી ઝીણી કણીઓ મળે છે, જો કે તેની કોઈ કિંમત નથી અને તે માત્ર પથ્થરસમાન જ છે.
