ગાંધીનગરઃ સુરતને ભારતનું ‘ગેટ વે ઓફ ટ્રેડ’ બનાવવા માટે નીતિઆયોગે માસ્ટર પ્લાન તૈયાર કર્યો છે. એક વર્ષ સુધી કરેલા અભ્યાસ અને રિસર્ચના અંતે તૈયાર કરાયેલા આ માસ્ટર પ્લાનમાં સુરતને ઇકોનોમિક રિજિયન બનાવવા માટે કુલ 54 પ્રોજેક્ટ ડેવલપ કરાશે, જેમાં ટૂરિઝમનો પણ સમાવેશ કરાયો છે. આ ઉપરાંત ટેક્સટાઇલ, ડાયમંડ, કેમિકલ, ફાર્મા અને એગ્રિકલ્ચર સેક્ટરમાં મહત્ત્વનાં પરિવર્તન લાવવા માટેનું આયોજન પણ કરાયું છે.
સુરત ખાતે ચીનના ગોન્ઝાઉની જેમ બીટુબી (બિઝનેસ ટુ બિઝનેસ) માટે ‘ભારત બજાર’ ઊભું કરાશે, જેને હાઇસ્પીડ રેલ ઝોનમાં બનાવાશે. જ્યારે દુબઈ જેવું બીટુસી (બિઝનેસ ટુ કન્ઝયુમર) ડ્રીમ સિટીમાં તૈયાર કરાશે. આનાથી સુરતને ટ્રેડિંગ ગેટ વે ઓફ ઇન્ડિયા તરીકે વિકસાવાશે. આ પ્રોજેક્ટના ડેવલપમેન્ટ માટે સુરત કોર્પોરેશન દ્વારા કન્સલ્ટન્ટની નિમણૂક કરાઈ છે અને RFP ટેન્ડર પણ તૈયાર કર્યું છે, જે નજીકના દિવસોમાં જાહેર કરાશે. રાજ્ય સરકારે પણ બજેટમાં આ માટે રૂ. 50 કરોડની જોગવાઈ કરી છે.
ગોન્ઝાઉની થીમ પર બનનારા બીટુબી મોડલમાં હોલસેલ માર્કેટ, મોલ્સ, બિઝનેસ હોટેલ્સ, હાઉસિંગ, શટલ સર્વિસ, મેટ્રો, હેલિપેડ, સિમલેસ કનેક્ટિવિટી વિથ ડ્રીમ સિટીની સુવિધા ઊભી કરાશે.
દુબઈની થીમ પર બનનારા બીટુસી મોડલમાં મોલ્સ, માર્કેટ પ્લેસ, શોપિંગ સ્ટ્રીટ, આર્ટિસન વિલેજ, મ્યુઝિયમ, રેસ્ટોરન્ટ, હોટેલ્સ, શટલ સર્વિસ અને મેટ્રો જેવી સુવિધા ઉપલબ્ધ બનશે.
