હજીરામાં બનેલું એન્ટિ સબમરિન યુદ્ધજહાજ INS માલવણ નેવીમાં સામેલ

સુરતઃ ભારતીય સમુદ્રી સીમાઓને વધુ સુરક્ષિત બનાવવા ભારત સરકારે આત્મનિર્ભરતા તરફ વધુ એક ઐતિહાસિક પગલું ભર્યું છે. સ્વદેશી ટેક્નોલોજીથી તૈયાર થયેલું ભારતીય નેવીનું અદ્યતન એન્ટિ-સબમરિન વોરફેર શેલો વોટરક્રાફ્ટ (ASW-SWC) ‘INS માલવણ’ 22 જુલાઈ, 2026ના રોજ કર્ણાટકના કારવાર ખાતે ભારતીય નેવીમાં વિધિવત્ સામેલ થયું છે. આ યુદ્ધજહાજના નિર્માણમાં વપરાયેલું 100 ટકા સ્પેશિયાલિટી સ્ટીલ સુરતસ્થિત AM/NS Indiaના હજીરા પ્લાન્ટમાં તૈયાર કરવામાં આવ્યું છે, જે સુરત માટે ગૌરવની ક્ષણ બની છે.
પ્રતિષ્ઠિત કોચીન શિપયાર્ડ લિમિટેડ દ્વારા નિર્મિત INS માલવણ ASW-SWC શ્રેણીનું બીજું યુદ્ધજહાજ છે. 80 ટકાથી વધુ સ્વદેશી ઘટકો ધરાવતું આ જહાજ સમુદ્રના ઓછા ઊંડાણમાં દુશ્મન સબમરિન શોધી તેનો નાશ કરવા, તેના પર સતત નજર રાખવા તેમજ દરિયામાં બિછાવાયેલી માઇન્સ શોધી તેને નિષ્ક્રિય કરવાની અદ્યતન ક્ષમતા ધરાવે છે.
AM/NS India આ શ્રેણીનાં તમામ આઠ યુદ્ધજહાજો માટે 100 ટકા વિશિષ્ટ સ્ટીલનો પુરવઠો પૂરો પાડી રહી છે, જે ભારતીય નેવી સાથેની તેની મજબૂત ભાગીદારીનો પુરાવો છે. AM/NS Indiaના હજીરા પ્લાન્ટમાં બનેલા સ્ટીલનો ઉપયોગ કંપનીની અદ્યતન ઉત્પાદન ક્ષમતા, ટેકનિકલ કુશળતા અને ઉચ્ચ ગુણવત્તાનાં ધોરણોને પ્રતિબિંબિત કરે છે.