નામ-કુળ કહેતાં યજમાનોની વંશાવલિ દર્શાવતા સિદ્ધપુરના ચોપડા ગોર

સિદ્ધપુરઃ શ્રાદ્ધ પક્ષનો આરંભ થયો છે. આ સમયે પિતૃશ્રાદ્ધ માટે ચાણોદ અને માતૃશ્રાદ્ધ માટે પ્રાચીન નગરી સિદ્ધપુર વિશ્વપ્રસિદ્ધ છે. સિદ્ધપુરનું બિંદુ સરોવર શ્રાદ્ધકર્મ માટે જેટલું પ્રખ્યાત છે એટલું જ મહત્ત્વ અહીંના ‘ચોપડા ગોર’નું છે.
ચોપડા ગોર એટલે કુળની પેઢીઓની માહિતી સાચવતા ગોર. યજમાન પોતાનું મૂળ વતન, અટક અને કુળની ઓળખ આપે એટલે ગોર વર્ષોથી સચવાતા ચોપડામાં પરિવારની નામાવલિ શોધી કાઢે છે. આ સાથે શ્રાદ્ધવિધિ માટે આવેલા યજમાનની નવી નોંધ પણ પરંપરાગત રીતે ઉમેરાય છે. એટલે પરિવાર માટે આ ચોપડો પેઢીથી પેઢીને જોડતી કુટુંબ-નામાવલીની નોંધ બને છે. સિદ્ધપુરના ઔદિચ્ય સહસ્ત્ર ગોરમંડળ સાથે જોડાયેલા ચોપડામાં દેશનાં વિવિધ ગામો-સ્થળોના યજમાનોની નામાવલી ઉપલબ્ધ રહે છે.
ઉપલબ્ધ સંદર્ભ પ્રમાણે ગોરમંડળ પાસે આશરે 96 ચોપડા છે, જેને ગોરમંડળના આશરે 40થી 45 સભ્ય સંભાળે છે. ચોપડામાં દેશનાં વિવિધ ગામો અને સ્થળોના યજમાનોની કુળ-નામાવલીની માહિતી સચવાયેલી હોવાનું જણાવાયું છે. પરિવારની નોંધ મળી આવ્યા બાદ સંબંધિત ગોર દ્વારા શ્રાદ્ધવિધિ કરાવાય છે.