વડોદરાઃ પશ્ચિમ બંગાળના બહેરામપુરાના ટીએમસીથી સાંસદ અને પૂર્વ ક્રિકેટર યુસુફ પઠાણને તાંદલજાસ્થિત નિવાસસ્થાન પાસેની TP-22ના ફાઇનલ પ્લોટ નં.90ની રૂ. 20.53 કરોડની 978 ચો.મી. જમીન ફાળવી દેવાનો રાજ્ય સરકાર દ્વારા નિર્ણય કરાયો છે, જેમાં વુડા 478 ચોરસ મીટર જમીન તેના પ્રવર્તમાન વેલ્યુએશનના 55 ટકા રકમ વસૂલીને ફાળવશે, જ્યારે 500 ચો.મી. જગ્યા વડોદરા મનપા યુસુફ પઠાણને ભેટસ્વરૂપે આપશે. 14 વર્ષથી ચાલતો આ વિવાદ હવે દેશભરમાં ચર્ચાનો મુદ્દો બન્યો છે. 2007 (T-20) અને 2011 (વન-ડે)માં ટીમ ઇન્ડિયા વર્લ્ડ ચેમ્પિયન બની ત્યારે યુસુફ પઠાણ તેના સભ્ય હતા. ત્યારબાદ વર્ષ 2012માં યુસુફ પઠાણે વડોદરા મ્યુનિ. કમિશનરને પત્ર લખી પોતાના બંગલાની બાજુના 978 ચો.મીટરના પ્લોટની ફાળવણી કરવા માગ કરી હતી.
