ભુજઃ કેનેડા અને ભારત વચ્ચે આર્થિક સંબંધોને મજબૂત બનાવવા અને સરકારી પહેલોને પૂરક બનાવવા કેનેડિયન હિન્દુ ચેમ્બર ઓફ કોમર્સ, ટોરોન્ટોએ કેનેડામાં તેના ચેપ્ટર્સ સાથે મળીને એક સમર્પિત ભારત વેપાર વિકાસ સમિતિની રચના કરી છે. આ ટ્રેડ કમિટીના ચેરમેન તરીકે નિમણૂક સાથે મૂળ કચ્છના અબડાસા તાલુકાના વતની અને વ્યવસાયઅર્થે કેનેડા સ્થાયી થયેલા હેમંત એમ. શાહ કેનેડાના વિનિપેગથી નેતૃત્વ સંભાળશે.
મેનિટોબા-ભારત વ્યાપારમાં પાંચ દાયકાથી વધુ સમયથી જોડાયેલા હેમંત શાહ કૃષિનિકાસ (અનાજ), ખાણકામ સાધનો, ઉડ્ડયન (કોર્પોરેટ વિમાન), મશીનરી અને પાઇલટ તાલીમ સહિતનાં ક્ષેત્રોમાં અનુભવ ધરાવે છે. વૈશ્વિક પ્રવાસી હેમંતભાઈએ ભારત અને ઉપખંડની અનેક મુલાકાતો કરી છે, જેના કારણે તેમને વિનિપેગ, કેનેડાના ‘મિસ્ટર ઇન્ડિયા’ ઉપનામ મળ્યું છે. વ્યાપારી સમુદાયો અને સરકારો તરફથી તેમને અનેક પુરસ્કારોથી સન્માનિત કરાયા છે.
